‘घोषणासम्राट’ आमदार राणा पाटील यांच्या पोकळ घोषणांच्या मालिकेत आज आपण पाहणार आहोत एक नवा ‘ब्लॉकबस्टर’ चित्रपट! या चित्रपटाचं नाव आहे – “हवेतली बसवसृष्टी”. रिलीज डेट होती १६ ऑक्टोबर २०२४.
उद्देश? अगदी सोपा आणि स्पष्ट! निवडणुका तोंडावर आल्या होत्या आणि लिंगायत समाजाची मते आपल्या पारड्यात पाडून घ्यायची होती. साहेबांनी नेहमीच्या सवयीप्रमाणे ‘मास्टरस्ट्रोक’ खेळला आणि थेट राज्यातील ‘पहिल्या’ बसवसृष्टीची घोषणा ठोकून दिली!
१६ ऑक्टोबर २०२४ ची ती ‘सुपरहिट’ पोस्ट आणि स्वप्नांचा महाल:
साहेबांनी पोस्टमध्ये अशी काही हवा केली होती, की वाचणाऱ्याला वाटावं आता नळदुर्ग थेट पॅरिसच होणार!
-
५ कोटींचा निधी आलाय: (कुठे आलाय? कोणत्या बँकेत जमा झालाय? कुणालाच माहीत नाही!)
-
६ एकर जागा: नळदुर्ग पालिकेच्या वाहनतळाची जागा ‘विशेष बाब’ म्हणून स्मारकासाठी घेतली.
-
भव्यदिव्य प्लॅनिंग: ५ एकरात महात्मा बसवेश्वर यांचा अश्वारूढ पुतळा, ध्यानकेंद्र, आकर्षक बागबगीचा, आणि म्हणे ‘लाईट अॅन्ड साऊंड-शो’!
-
उरलेल्या १ एकरात: हरितक्रांतीचे प्रणेते वसंतराव नाईक यांचं स्मारक.
प्लॅनिंग एवढं भारी होतं की ‘बाहुबली’च्या माहिष्मती राज्याचा सेटही यापुढे फिका पडावा. नळदुर्गला थेट राज्याच्या नकाशावर ‘पर्यटनस्थळ’ म्हणून झळकवण्याची साहेबांची ती महत्त्वाकांक्षा पाहून अनेकांचे डोळे पाणावले असतील.
दोन वर्षे उलटली… ‘लाईट’ गेला आणि ‘साऊंड’ही बंद!
आज फेब्रुवारी २०२६ उजाडलाय. जवळपास दीड-दोन वर्षे लोटली. या ‘भव्यदिव्य’ जागेवर सध्या काय परिस्थिती आहे? तिथे साधी एक वीट तरी रचली गेली का?
५ कोटींचा निधी कुठल्या ‘ध्यानकेंद्रात’ जाऊन अंतर्धान पावलाय, हे साक्षात देवालाच माहीत! ‘लाईट अॅन्ड साऊंड-शो’ तर सोडाच, तिथे रात्रीच्या वेळी साधी स्ट्रीट लाईट तरी लागते का, हा संशोधनाचा विषय आहे. साहेबांच्या ‘विशेष बाबी’ फक्त घोषणेपर्यंतच मर्यादित होत्या हे आता स्पष्ट झालंय.
तात्पर्य:
निवडणुकीच्या आधी लिंगायत समाजाच्या भावनांना हात घालायचा, मते मिळवायची आणि एकदा खुर्ची मिळाली की सगळं विसरून जायचं! नळदुर्गची बसवसृष्टी आणि वसंतराव नाईक स्मारक सध्या फक्त राणा पाटलांच्या फेसबुक पोस्टमध्येच ‘आकर्षकपणे’ उभं आहे. प्रत्यक्षात मात्र तिथे फक्त हवेतल्या घोषणांची धूळ उडताना दिसतेय.
आता प्रश्न पडतो… निवडणुका तर झाल्या, आता आमदार साहेब लोकांना विसर पाडण्यासाठी कोणती नवीन पोकळ घोषणा घेऊन बाजारात येणार?
