ओमराजे को गुस्सा क्यो आता है?

मंडळी, आपला धाराशिव जिल्हा म्हणजे राजकीय आखाड्यापेक्षा कमी नाही! आणि या आखाड्यातले दोन तगडे पैलवान म्हणजे आपले दोन  ‘दादा’ – खासदार ओमराजे निंबाळकर आणि त्यांचे चुलत बंधू आमदार राणा जगजितसिंह पाटील. आता ओमराजे आहेत ठाकरे गटाचे ‘वाघ’, तर राणादादा आहेत भाजपचे ‘कमळधारी’. दोघांमध्ये म्हणे छत्तीसचा आकडा आहे (आता हे ३६ म्हणजे नक्की काय, हे गणिताच्या शिक्षकालाच विचारायला हवं!).

कुस्तीचा इतिहास:

विधानसभेत दोघे दोनदा भिडले, स्कोर १-१. लोकसभेतही दोनदा सामना झाला, पण इथे मात्र ओमराजेनी दोन्ही वेळा राणादादा आणि त्यांच्या पत्नीला अस्मान दाखवलं. म्हणजे लोकसभा फायनलचे हिरो आपले ओमराजेच!

नाराजी नाट्य – ताजा अंक:

तर काल सोमवारी काय झालं, आपले ओमराजे काहीतरी तुळजापूरच्या लोकांची गार्‍हाणी घेऊन जिल्हाधिकारी साहेबाच्या  दरबारात पोहोचले. पण साहेब १५ मिनिटं लेट! आणि एसपी साहेब तर डायरेक्ट ‘कटली’! आता सांगा, वाघाच्या गुहेत उशिरा जायचं आणि तेही रिकाम्या हातानं? मग काय, दादांचा पारा चढला! त्यांनी भर दरबारात साहेबांची अशी काही ‘शाळा’ घेतली की विचारू नका. मीडियावाले पण टपून बसलेले, लगेच ब्रेकिंग न्यूज! ओमराजे कलेक्टर साहेबांवर भडकले… मग काय ? जनतेत संदेश पोहचला… ओमराजे उर्फ दादा खुश!

पण खरं कारण काय?

वरवर पाहता कारण होतं कलेक्टर साहेबांचा उशीर आणि एसपींची दांडी. पण आतली बातमी वेगळीच! दादा म्हणतात, पालकमंत्री सांगूनही कलेक्टर साहेब त्यांच्या खुर्चीशेजारी खुर्ची म्हणजे ऑफिससाठी जागा देत नाहीत आणि वर २५० कोटींच्या कामांना स्थगिती दिली (यात दादांनी शिफारस केलेली कामं पण होती!). आता सांगा, २५० कोटी म्हणजे काय लहान रक्कम आहे? एवढ्यात तर अर्धा जिल्हा नवीन बांधता येईल!

व्हिलन कोण? (दादांच्या मते):

दादांच्या मते या सगळ्यामागे आहेत ‘कळीचे नारद’ – अर्थात राणादादा! तेच म्हणे पडद्यामागून सूत्रं हलवतात आणि अधिकाऱ्यांच्या कानात काहीतरी ‘मंत्र’ फुंकतात. आता खरं काय खोटं, ते त्या दोघांनाच ठाऊक!

राणादादा काय म्हणतात?

काहीच नाही! ते एकदम ‘कूल’ आहेत. फक्त गालातल्या गालात हसून सगळी मजा बघत असावेत. कदाचित विचार करत असतील, “येऊ द्या, येऊ द्या… राग येऊ द्या!”

बिचारे अधिकारी आणि जनता:

या दोन दादांच्या भांडणात अधिकाऱ्यांची अवस्था ‘इकडे आड तिकडे विहीर’ अशी झाली आहे. सत्तेतल्या दादांचं ऐकावं तर विरोधातले दादा नाराज, विरोधातल्या दादांचं ऐकावं तर सत्तेतले दादा डोळे मोठे करणार! आणि या सगळ्यात जिल्ह्याच्या विकासाचा रथ मात्र जागच्या जागीच अडकून पडलाय, असं लोक कुजबुजतात.

तर मंडळी, ओमराजेना राग का येतो, याची ही काही प्रमुख कारणं! आता पुढचा अंक कधी आणि कसा रंगणार, हे बघायला आपल्याला पुन्हा एकदा पॉपकॉर्न घेऊन बसावं लागेल! तोपर्यंत, तुम्हीच सांगा, दादांचा राग योग्य आहे की नाही? 😉