धाराशिव: येथील नगर पालिकेतील पाच महत्त्वाच्या अधिकारी – कर्मचाऱ्यांच्या बदल्या करण्यात आल्या आहेत, ज्यामुळे पालिकेच्या कामकाजावर मोठा परिणाम होण्याची शक्यता आहे. विशेष म्हणजे, या पाच बदल्यांच्या बदल्यात शासनाने केवळ एकाच कर्मचाऱ्याची धाराशिव येथे नियुक्ती केली असून, उर्वरित चार पदे अद्याप रिक्त आहेत.
प्रशासकीय कामकाजाचा भाग म्हणून या बदल्या करण्यात आल्या आहेत. यामध्ये पालिकेतील महत्त्वाच्या पदांवर कार्यरत असलेल्या अधिकाऱ्यांचा समावेश आहे. बदली झालेल्या कर्मचाऱ्यांची नावे व त्यांची नवीन नियुक्तीची ठिकाणे खालीलप्रमाणे:
- संदीप दुबे (स्थापत्य अभियंता): औसा
- कौस्तुभ घडे (विद्युत अभियंता): हिंगोली
- पृथ्वीराज पवार (उपमुख्य अधिकारी): उदगीर
- भारत साळुंके (कर निर्धारक): बार्शी
- श्रीमती संजोत सावंत (कर निर्धारक): तुळजापूर
या पाचपैकी एकच जागा भरण्यात आली आहे. अक्कलकोटचे शैलेश बिराजदार यांची धाराशिवला कर निर्धारक व प्रशासकीय अधिकारी म्हणून नियुक्ती करण्यात आली आहे.
या बदल्यांमुळे पालिकेतील अभियांत्रिकी, प्रशासन आणि कर आकारणी यांसारखी महत्त्वाची पदे रिक्त झाली आहेत. एकाच वेळी पाच अनुभवी अधिकारी गेल्याने आणि त्यांच्या जागी नवीन नियुक्त्या न झाल्याने पालिकेच्या दैनंदिन कामकाजावर आणि विकास योजनांवर परिणाम होण्याची शक्यता वर्तवली जात आहे. नागरिकांशी संबंधित कामे खोळंबण्याची भीतीही व्यक्त केली जात आहे. शासनाने रिक्त झालेल्या पदांवर लवकरात लवकर नवीन अधिकाऱ्यांची नियुक्ती करावी, अशी मागणी जोर धरू लागली आहे.
