वाशी – तालुक्यातील ईट येथे शेतीच्या जुन्या वादातून एका २८ वर्षीय तरुणाला चौघांनी मिळून जातीवाचक शिवीगाळ करत मारहाण केल्याची धक्कादायक घटना उघडकीस आली आहे. याप्रकरणी पीडित तरुणाने दिलेल्या फिर्यादीवरून वाशी पोलीस ठाण्यात चौघांविरोधात ॲट्रॉसिटी कायद्यासह भारतीय न्याय संहितेतील विविध कलमांन्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, फिर्यादी राजू सुनील शिंदे (वय २८, रा. ईट) यांचा आरोपींसोबत शेतीवरून वाद सुरू आहे. याच वादातून २ जून रोजी दुपारी दोन वाजण्याच्या सुमारास घाटनांदुर शिवारातील गट नंबर १४१ मधील एका शेतात आरोपींनी राजू शिंदे यांना गाठले. तिथे त्यांनी गैरकायद्याची मंडळी जमवून राजू यांना जातीवाचक शिवीगाळ करण्यास सुरुवात केली.
त्यानंतर आरोपींनी त्यांना लाथाबुक्यांनी मारहाण करून जखमी केले आणि ‘तुझे पाय मोडून टाकतो’ अशी धमकी दिली. या घटनेनंतर राजू शिंदे यांनी ६ जून रोजी वाशी पोलीस ठाण्यात तक्रार दाखल केली.
त्यांच्या तक्रारीवरून पोलिसांनी नाना बुरुंगे, प्रशांत नाना बुरुंगे, रमेश पवार आणि अनिल नाना बुरुंगे (सर्व रा. ईट, ता. भूम) यांच्याविरोधात गुन्हा नोंदवला आहे. या प्रकरणाचा पुढील तपास वाशी पोलीस करत आहेत.
