धाराशिव/कळंब: तुळजापूर ड्रग्ज प्रकरणाचा कथित सूत्रधार विनोद उर्फ पिटू गंगणे याच्या अटकेनंतरच्या कायदेशीर लढाईला आता वेग आला आहे. शुक्रवारी रात्री (६ जून) नाट्यमयरित्या अटक केल्यानंतर, शनिवारी (७ जून) त्याला सुट्टीमुळे कळंब येथील न्यायालयात हजर करण्यात आले. येथे सरकारी आणि बचाव पक्षाच्या जोरदार युक्तिवादानंतर न्यायालयाने गंगणेला ९ जूनपर्यंत पोलीस कोठडी सुनावली आहे. विशेष म्हणजे, पोलिसांना आता त्याच्यावर केवळ खरेदीदार म्हणूनच नव्हे, तर ‘तस्करीचा कट रचणे आणि इतरांना ड्रग्जसाठी प्रोत्साहन देणे’ यासाठी कलम २९ हे नवे अस्त्र वापरण्याची परवानगी मिळाली आहे.
पोलीस कोठडीसाठी न्यायालयात घमासान
तामलवाडी पोलिसांनी गंगणेच्या ७ दिवसांच्या कोठडीची मागणी केली, ज्याला आरोपीच्या वकिलांनी जोरदार विरोध केला. सरकारी वकील ॲड. किरण कोळपे यांनी न्यायालयासमोर अत्यंत महत्त्वाचे मुद्दे मांडले:
- मोठे रॅकेट: हा गुन्हा साधासुधा नसून, यामागे ड्रग्ज तस्करीचे एक मोठे रॅकेट सक्रिय आहे.
- थेट आर्थिक संबंध: आरोपी गंगणेचे ड्रग्ज तस्करांशी थेट आर्थिक व्यवहार आणि संबंध होते. त्याने तब्बल १२ लाख रुपयांचे ड्रग्ज खरेदी केले आहेत.
- गायब मोबाईलचा शोध: आरोपीने आपला मुख्य फोन अद्याप पोलिसांना दिलेला नाही. त्या मोबाईलचा शोध घेणे आणि त्यातील पुरावे हस्तगत करणे तपासासाठी अत्यंत आवश्यक आहे.
आरोपीच्या वकिलांनी पोलीस कोठडीची गरज नसल्याचा युक्तिवाद केला. मात्र, सरकारी पक्षाने मांडलेले पुरावे आणि गुन्ह्याचे गांभीर्य, विशेषतः गंगणेने दुसऱ्यांच्या खात्यावरून तस्करांना पैसे पाठवल्याचा मुद्दा लक्षात घेऊन, न्यायालयाने ९ जूनपर्यंत पोलीस कोठडी मंजूर केली.
काय आहे कलम २९? का वाढल्या गंगणेच्या अडचणी?
आतापर्यंत गंगणेवर ड्रग्ज खरेदीचे आरोप होते. मात्र, कलम २९ (कट रचणे आणि प्रोत्साहन देणे) लावल्यामुळे तो या प्रकरणात केवळ एक ग्राहक नसून, या गुन्हेगारी कटाचा एक भाग असल्याचे मानले जात आहे. याचा अर्थ, तो इतरांना ड्रग्ज घेण्यासाठी प्रवृत्त करत होता आणि तस्करांसोबत मिळून हा कट रचत होता. या नवीन कलमामुळे गंगणेभोवतीचा कायदेशीर फास अधिकच आवळला गेला असून, आता या प्रकरणातील इतर ‘मोठ्या माशां’पर्यंत पोहोचण्याचा पोलिसांचा मार्ग अधिक सोपा होऊ शकतो.
आता या पोलीस कोठडीच्या काळात गंगणेकडून पोलीस काय माहिती काढून घेतात, तो गायब केलेला मोबाईल सापडतो का, आणि त्यातून आणखी कोणाकोणाची नावे समोर येतात, याकडे संपूर्ण राज्याचे लक्ष लागले आहे.
