नळदुर्ग – शेत रस्त्याच्या जुन्या कारणावरून एका 77 वर्षीय वृद्ध व्यक्तीला कुऱ्हाडीचा तुंबा आणि काठीने गंभीर मारहाण केल्याची धक्कादायक घटना तुळजापूर तालुक्यातील मुर्टा येथे घडली आहे. याप्रकरणी दोन आरोपींविरुद्ध नळदुर्ग पोलीस ठाण्यात गुन्हा दाखल करण्यात आला आहे.
गोविंद शंकर सुरवसे (वय ७७, रा. मुर्टा, ता. तुळजापूर) असे फिर्यादीचे नाव आहे. त्यांनी दिलेल्या फिर्यादीनुसार, गुंड्डा शंकर सुरवसे आणि लता गुंड्डा सुरवसे (दोघे रा. मुर्टा) यांनी १० मे २०२५ रोजी सकाळी सव्वासातच्या सुमारास मुर्टा शिवारातील गट क्रमांक २५ मध्ये फिर्यादी गोविंद सुरवसे यांना अडवले.
शेतीच्या रस्त्याच्या कारणावरून आरोपींनी फिर्यादीला शिवीगाळ करण्यास सुरुवात केली. त्यानंतर लाथाबुक्यांनी, कुऱ्हाडीच्या तुंब्याने आणि काठीने जबर मारहाण करून गंभीर जखमी केले. तसेच, जीवे मारण्याची धमकी दिल्याचेही फिर्यादीत म्हटले आहे.
या घटनेनंतर गोविंद सुरवसे यांनी ७ जून २०२५ रोजी नळदुर्ग पोलीस ठाण्यात तक्रार दाखल केली. त्यांच्या तक्रारीवरून पोलिसांनी आरोपी गुंड्डा सुरवसे आणि लता सुरवसे यांच्या विरोधात भारतीय न्याय संहिता कलम ११७, ११५(२), ३५२, ३५१(२), आणि ३(५) अन्वये गुन्हा नोंदवला आहे. या प्रकरणाचा पुढील तपास नळदुर्ग पोलीस करत आहेत.
