धाराशिव: जनावरांच्या गोठ्याचे अनुदान मिळवून देण्याच्या बहाण्याने एका महिलेने अनेक शेतकऱ्यांकडून पैसे उकळून त्यांची फसवणूक केल्याची धक्कादायक घटना धाराशिवमध्ये घडली आहे. या प्रकरणी वंदना एकनाथ लोकरे नावाच्या महिलेविरोधात आनंदनगर पोलीस ठाण्यात गुन्हा दाखल करण्यात आला आहे.
ज्ञानेश्वर महादेव काळे (वय ३५, रा. गौडगाव) यांनी दिलेल्या फिर्यादीनुसार, आरोपी वंदना एकनाथ लोकरे (रा. धाराशिव) यांनी पंचायत समिती, धाराशिव येथून जनावरांच्या गोठ्यासाठी अनुदान मंजूर करून देण्याचे आमिष दाखवले. फिर्यादी ज्ञानेश्वर काळे, त्यांचे मित्र रोहन पांडुरंग भोयटे (रा. रुईभर), ओमकार अशोक भोसले (रा. गौडगाव) आणि इतर शेतकऱ्यांना या योजनेखाली फाईल बनवून देण्याचे आश्वासन दिले.
या कामासाठी आरोपी महिलेने २४ एप्रिल २०२४ ते १० जुलै २०२४ या कालावधीत फिर्यादी आणि इतर शेतकऱ्यांकडून एकूण ८०,००० रुपये घेतले. मात्र, त्यानंतरही अनुदान न मिळाल्याने आणि आपली फसवणूक झाल्याचे लक्षात आल्यानंतर ज्ञानेश्वर काळे यांनी २६ जून २०२५ रोजी आनंदनगर पोलीस ठाण्यात धाव घेत तक्रार दाखल केली.
ज्ञानेश्वर काळे यांच्या फिर्यादीवरून आरोपी वंदना एकनाथ लोकरे यांच्या विरोधात भारतीय न्याय संहिता कलम ३१६(२) आणि ३१८(४) अन्वये फसवणुकीचा गुन्हा नोंदवण्यात आला आहे. पोलीस या प्रकरणाचा अधिक तपास करत आहेत. या घटनेमुळे शासकीय योजनांच्या नावाखाली होणाऱ्या फसवणुकीचा प्रकार पुन्हा एकदा समोर आला आहे.
