धाराशिव : धाराशिव जिल्ह्याच्या राजकारणात एक नवा आणि रंजक अध्याय लिहिला गेला आहे. भूम-परांडा मतदारसंघाचे माजी आमदार राहुल मोटे यांनी शरद पवार गटाला रामराम ठोकत उपमुख्यमंत्री अजित पवार यांच्या राष्ट्रवादी काँग्रेसमध्ये प्रवेश केला आहे. विशेष म्हणजे, या पक्षप्रवेशामागे केवळ राजकीय गणितं नसून कौटुंबिक संबंधांचेही धागेदोरे घट्ट विणलेले दिसत आहेत. दुसरीकडे, गेल्या चार महिन्यांपासून विकासाला खीळ घालणाऱ्या जिल्हा नियोजन समितीच्या निधीवरील स्थगिती उठवण्याचे आश्वासन अजित पवारांनी दिले आहे, ज्यामुळे एका नव्या वादाला तोंड फुटले आहे.
गेल्या चार महिन्यांपासून स्थगितीमुळे अडकून पडलेला धाराशिव जिल्ह्याचा २६८ कोटी रुपयांचा विकासनिधी अखेर मार्गी लागण्याची चिन्हे आहेत. मात्र, हा मार्ग माजी आमदार राहुल मोटे यांच्या पक्षबदलाच्या व्यासपीठावरून मोकळा झाल्याने, हा निधी विकासासाठी होता की राजकीय सौदेबाजीसाठी ‘ओलीस’ ठेवला होता, असा गंभीर प्रश्न उपस्थित झाला आहे.
निधीचा वाद: महायुतीतील सुंदोपसुंदीचा जिल्ह्याला फटका
धाराशिव जिल्ह्याच्या विकासाला खरी खीळ बसली ती महायुतीतील अंतर्गत वादामुळे. जिल्ह्याचे पालकमंत्री प्रताप सरनाईक (शिवसेना, शिंदे गट) आणि तुळजापूरचे भाजप आमदार राणा पाटील यांच्यातील संघर्ष निधीवाटपावरून विकोपाला गेला.
- वादाचे मूळ: पालकमंत्री सरनाईक यांनी जिल्हा नियोजन समितीच्या निधीचे वाटप करताना तब्बल ४०% निधी स्वतःकडे ठेवला. सत्ताधारी पक्षाच्या आमदारांना १५%, तर विरोधी पक्षाच्या आमदारांना आणि ठाकरे गटाच्या खासदारांना केवळ १०% निधी देण्याचा प्रस्ताव ठेवला.
- भाजपचा आक्षेप: या वाटपावर आमदार राणा पाटील यांनी तीव्र आक्षेप घेत थेट उपमुख्यमंत्री अजित पवार आणि मुख्यमंत्री देवेंद्र फडणवीस यांच्याकडे तक्रार केली.
- परिणाम: या तक्रारीनंतर वरिष्ठ पातळीवरून सूत्रे हलली आणि संपूर्ण २६८ कोटींच्या निधी वाटपाला स्थगिती देण्यात आली. यामुळे जिल्ह्याची विकासकामे पूर्णपणे ठप्प झाली. हा वाद इतका वाढला की, पालकमंत्री सरनाईक यांनी धाराशिव शहरातील १४० कोटींच्या रस्त्यांच्या कामांचे टेंडरही रद्द केले.
पक्षबदल होताच स्थगिती उठणार? टायमिंगवर प्रश्नचिन्ह
मंगळवारी राहुल मोटे यांनी अजित पवार गटात प्रवेश करताच, खुद्द अजित पवारांनी या २६८ कोटींच्या निधीवरील स्थगिती लवकरच उठवण्यात येईल, असे जाहीर केले. तसेच, महायुतीतील तिन्ही पक्षांमध्ये (भाजप, शिवसेना-शिंदे गट, राष्ट्रवादी-अजित पवार गट) निधी वाटपाचे नवे सूत्र ठरवले जाईल, असेही संकेत दिले.
याच टायमिंगवर शिवसेना (ठाकरे गट) यांनी जोरदार टीका केली आहे. “जर निधी द्यायचाच होता, तर चार महिने का थांबवला? राहुल मोटे यांच्या पक्षप्रवेशाची वाट पाहत जिल्ह्याचा विकास थांबवणे योग्य आहे का?” असा थेट सवाल विचारला जात आहे. यामुळे, प्रशासकीय निर्णय आणि राजकीय खेळी यातील रेषा पुसट झाली आहे.
एकीकडे, २०२४-२५ चा निधी वादात अडकला असताना, २०२५-२६ च्या निधीचा एक रुपयाही जिल्ह्याला मिळालेला नाही. आता अजित पवारांच्या आश्वासनानंतर ही आर्थिक कोंडी फुटेल अशी आशा आहे, पण त्यामागे जिल्ह्याच्या विकासाची तळमळ आहे की राजकीय समीकरणे जुळवण्याचा डाव आहे, याचे उत्तर येणारा काळच देईल.
नात्यागोत्यांच्या राजकारणात अजितदादांची ‘पॉवर प्ले’
राहुल मोटे यांचा अजित पवार गटातील प्रवेश हा केवळ एक राजकीय बदल नाही, तर नात्यागोत्यांच्या राजकारणाचा एक उत्तम नमुना आहे. अजित पवार हे भाजपचे आमदार राणा पाटील यांच्या आत्याचे पती आहेत, तर दुसरीकडे ते राहुल मोटे यांच्या मावशीचेही पती आहेत. या नात्याने राहुल मोटे आणि राणा पाटील हे आते-मामे भाऊ आहेत. आतापर्यंत वेगवेगळ्या राजकीय प्रवाहांमध्ये असलेले हे दोन भाऊ मोटे यांच्या पक्षबदलामुळे ‘महायुती’च्या एकाच छताखाली आले आहेत. अजित पवारांनी आपल्या कौटुंबिक आणि राजकीय वजनाचा वापर करून धाराशिवच्या राजकारणाची समीकरणेच बदलून टाकली आहेत.
