तुळजापूर : तुळजापूर येथील जुन्या बस स्थानकात सोलापूरकडे जाणाऱ्या बसमध्ये चढत असताना गर्दीचा फायदा घेऊन एका महिलेच्या पर्समधील सोन्या-चांदीचे दागिने आणि रोख रक्कम असा एकूण सव्वा लाखांचा मुद्देमाल अज्ञात चोराने लंपास केल्याची घटना घडली आहे.
याप्रकरणी योगीता राम शेनमारे (वय ३०, रा. पिंपळा बुद्रुक, ता. तुळजापूर) यांनी तुळजापूर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, ही घटना १० ऑगस्ट २०२५ रोजी दुपारी अडीच वाजण्याच्या सुमारास घडली. योगीता शेनमारे या तुळजापूर-सोलापूर बसमध्ये चढत होत्या. बसमध्ये मोठी गर्दी असल्याने अज्ञात व्यक्तीने याच गर्दीचा फायदा घेतला आणि त्यांच्या पर्समधून २० ग्रॅम वजनाचे सोन्याचे दागिने, काही चांदीचे दागिने आणि ३,००० रुपयांची रोख रक्कम असा एकूण १ लाख २४ हजार ८०० रुपयांचा ऐवज चोरून नेला.
बसमध्ये बसल्यानंतर काही वेळाने पर्स तपासली असता चोरीचा प्रकार त्यांच्या लक्षात आला. त्यानंतर त्यांनी तातडीने तुळजापूर पोलीस ठाणे गाठून फिर्याद दाखल केली.
योगीता शेनमारे यांच्या तक्रारीवरून तुळजापूर पोलिसांनी अज्ञात आरोपीविरुद्ध भारतीय न्याय संहितेच्या कलम ३०३(२) अन्वये गुन्हा नोंदवला असून, पोलीस पुढील तपास करत आहेत. सणासुदीच्या आणि गर्दीच्या काळात प्रवाशांनी आपल्या मौल्यवान वस्तूंची काळजी घ्यावी, असे आवाहन पोलिसांनी केले आहे.
माडज शिवारातून शेतकऱ्याचा विद्युत पंप आणि शेती साहित्य लंपास
उमरगा तालुक्यातील माडज शिवारातील एका विहिरीवरून अज्ञात चोराने ७.५ हॉर्सपॉवरचा विद्युत पंप आणि इतर शेती उपयोगी साहित्य चोरून नेल्याची घटना घडली आहे. यामुळे परिसरातील शेतकऱ्यांमध्ये चिंतेचे वातावरण पसरले आहे.
याप्रकरणी इंद्रजित विठ्ठल गायकवाड (वय ६३, रा. माडज, ता. उमरगा) यांनी उमरगा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, गायकवाड यांच्या मालकीचे माडज शिवारातील गट क्रमांक ६/१/१ मध्ये शेत आहे. त्यांच्या विहिरीवर बसवलेला ७.५ एचपी क्षमतेचा ‘ॲक्वाटेक’ कंपनीचा विद्युत पंप, स्टार्टर, टिकाव, फावडे, पाने आणि इतर शेती उपयोगी साहित्य, असा एकूण १५,००० रुपये किमतीचा मुद्देमाल अज्ञात व्यक्तीने चोरून नेला.
ही चोरीची घटना ६ ऑगस्ट २०२५ रोजी सकाळी ११ वाजण्याच्या सुमारास घडली असल्याचे गायकवाड यांनी आपल्या तक्रारीत म्हटले आहे. याप्रकरणी त्यांनी १० ऑगस्ट रोजी उमरगा पोलीस ठाण्यात तक्रार दाखल केली.
इंद्रजित गायकवाड यांच्या फिर्यादीवरून, उमरगा पोलिसांनी अज्ञात आरोपीविरुद्ध भारतीय न्याय संहितेच्या कलम ३०३(२) अन्वये गुन्हा नोंदवला आहे. पोलीस या प्रकरणाचा अधिक तपास करत आहेत. वारंवार होणाऱ्या अशा चोऱ्यांमुळे शेतकरी वर्ग त्रस्त झाला आहे.
