तुळजापूर: “मिरवणुकीत मला बैल का धरू दिला नाही?” या अत्यंत क्षुल्लक कारणावरून झालेल्या वादातून तामलवाडी (ता. तुळजापूर) येथे एका २१ वर्षीय तरुणाला सात जणांच्या टोळक्याने लाकडाने आणि लाथाबुक्क्यांनी बेदम मारहाण केल्याची घटना घडली आहे. या हल्ल्यात तरुण जखमी झाला असून, त्याला जीवे मारण्याची धमकीही देण्यात आली आहे. याप्रकरणी तामलवाडी पोलीस ठाण्यात सात जणांविरोधात गुन्हा दाखल करण्यात आला आहे.
समीर रजाक मुल्ला (वय २१, रा. तामलवाडी) असे मारहाण झालेल्या तरुणाचे नाव आहे. त्याने दिलेल्या फिर्यादीनुसार, ही घटना २२ ऑगस्ट २०२५ रोजी रात्री साडेआठ वाजण्याच्या सुमारास तामलवाडी गावात घडली. गावातील मिरवणुकीदरम्यान झालेल्या वादातून आरोपी निजाम शेख, मोईन गॅसोद्दीन शेख, इब्राहिम अकील पटेल, परवेज अजीज पटेल, सोहेल अशफाक शेख, अझर शेख आणि सलमान काशीम शेख (सर्व रा. तामलवाडी) यांनी गैरकायद्याची मंडळी जमवली.
त्यांनी समीर याला ‘मला बैल का धरू दिला नाही?’ असा जाब विचारत शिवीगाळ केली. त्यानंतर या वादाचे रूपांतर मारहाणीत झाले. आरोपींनी त्याला लाकडी दांडके आणि लाथाबुक्क्यांनी मारहाण करून जखमी केले व जिवे मारण्याची धमकी दिली.
या हल्ल्यानंतर समीर मुल्ला याने २३ ऑगस्ट रोजी तामलवाडी पोलीस ठाण्यात धाव घेऊन तक्रार दाखल केली. पोलिसांनी त्याच्या फिर्यादीवरून सातही आरोपींविरोधात भारतीय न्याय संहितेच्या विविध कलमांनुसार मारहाण, गैरकायदेशीर मंडळी जमवणे आणि धमकी देणे यांसारखे गुन्हे नोंदवले आहेत. पोलीस याप्रकरणी पुढील तपास करत आहेत.
दुसऱ्या गटाकडूनही कोयत्याने हल्ला केल्याचा गुन्हा दाखल
तुळजापूर: तामलवाडी येथे शुक्रवारी रात्री झालेल्या मारहाण प्रकरणाला आता नवे वळण लागले आहे. ‘मिरवणुकीत बैल का धरू दिला नाही’ या कारणावरून झालेल्या मारहाणीनंतर आता दुसऱ्या गटानेही ‘दारू पिण्यास पैसे दिले नाहीत म्हणून कोयत्याने हल्ला करून जीवे मारण्याचा प्रयत्न केला’ असा आरोप करत परस्परविरोधी फिर्याद दाखल केली आहे. या दुसऱ्या तक्रारीवरून तामलवाडी पोलीस ठाण्यात पाच जणांविरोधात गुन्हा दाखल करण्यात आला आहे.
अशीफ गय्यासोद्दीन शेख (वय ३०, रा. तामलवाडी) यांनी याप्रकरणी फिर्याद दिली आहे. त्यांच्या तक्रारीनुसार, ही घटना २२ ऑगस्ट रोजी रात्री साडेआठ ते पावणेनऊच्या दरम्यान तामलवाडीतील एका पान शॉपजवळ, ब्रिजखालील सर्व्हिस रोडवर घडली. आरोपी समीर रज्जाक मुल्ला, इरफान हामीद पठाण, सोहेल हामीद पठाण, सलमान जाकीर पठाण आणि इम्रान खलील बेगडे (सर्व रा. तामलवाडी) यांनी अशीफ यांना अडवले.
‘दारू पिण्यासाठी पैसे दे’ अशी मागणी करत आरोपींनी शिवीगाळ केली. पैसे देण्यास नकार दिल्याने, त्यांनी गैरकायद्याची मंडळी जमवून लाथाबुक्क्यांनी, काठीने आणि कोयत्याने मारहाण करून जखमी केले व जीवे मारण्याची धमकी दिली, असे फिर्यादीत म्हटले आहे. अशीफ शेख यांनी २३ ऑगस्ट रोजी दिलेल्या या तक्रारीवरून तामलवाडी पोलिसांनी पाचही आरोपींविरोधात भारतीय न्याय संहितेच्या विविध कलमांनुसार गुन्हा नोंदवला आहे.
विशेष म्हणजे, या घटनेतील मुख्य आरोपी असलेला समीर मुल्ला हाच यापूर्वीच्या घटनेत फिर्यादी होता. त्याने दिलेल्या तक्रारीत, अशीफ शेख यांच्या गटातील लोकांनी ‘बैल का धरू दिला नाही’ या कारणावरून मारहाण केल्याचे म्हटले होते. आता दोन्ही गटांनी एकमेकांवर गंभीर आरोप करत परस्परविरोधी गुन्हे दाखल केल्याने प्रकरणाचे गांभीर्य वाढले आहे. तामलवाडी पोलीस दोन्ही प्रकरणांचा समांतर तपास करत आहेत.
