नळदुर्ग : ईद-ए-मिलाद मिरवणुकीत औरंगजेबाच्या नावाचा जयघोष केल्याच्या घटनेचे आज नळदुर्ग शहरात तीव्र पडसाद उमटले. सकल हिंदू समाज संघटनेने पुकारलेल्या ‘नळदुर्ग बंद’ला शहरवासीयांनी शंभर टक्के प्रतिसाद देत आपले व्यवहार बंद ठेवले. यासोबतच, शहराच्या प्रमुख मार्गांवरून एक भव्य निषेध मोर्चा काढण्यात आला, ज्यामध्ये आरोपींवर तात्काळ गुन्हा दाखल करून त्यांना अटक करण्याची जोरदार मागणी करण्यात आली.
सकल हिंदू समाजाच्या आवाहनानुसार, आज सकाळपासूनच शहरातील सर्व दुकाने, बाजारपेठा, हॉटेल्स आणि इतर व्यावसायिक प्रतिष्ठाने पूर्णपणे बंद होती. रस्त्यांवर शुकशुकाट पसरला होता, तर वाहतूकही तुरळक प्रमाणात दिसून आली. शहरातील नागरिकांनी उत्स्फूर्तपणे बंदमध्ये सहभागी होऊन या घटनेचा निषेध नोंदवला.
सकाळी १०:३० वाजता ठरल्याप्रमाणे, शेकडो नागरिक आणि विविध हिंदुत्ववादी संघटनांचे कार्यकर्ते भवानी चौक येथे एकत्र जमले. येथून भव्य निषेध मोर्चाला सुरुवात झाली. मोर्चा शहराच्या प्रमुख मार्गांवरून फिरून पुन्हा मुख्य चौकात पोहोचला. “छत्रपती शिवाजी महाराजांच्या महाराष्ट्रात औरंग्याचे उदात्तीकरण खपवून घेणार नाही,” “समाजकंटकांना तात्काळ अटक करा,” अशा घोषणांनी मोर्चेकरांनी परिसर दणाणून सोडला.
मोर्चाच्या समारोपप्रसंगी, शिष्टमंडळाने पुन्हा एकदा पोलीस प्रशासनाला आपल्या मागण्यांचे निवेदन दिले. जोपर्यंत आरोपींवर कठोर कायदेशीर कारवाई होत नाही, तोपर्यंत आम्ही शांत बसणार नाही, असा निर्धार यावेळी व्यक्त करण्यात आला. या मोर्चा आणि बंदच्या पार्श्वभूमीवर शहरात कोणताही अनुचित प्रकार घडू नये यासाठी पोलिसांनी चोख बंदोबस्त ठेवला होता. या घटनेमुळे शहरातील वातावरण गंभीर असून, पोलीस प्रशासनाच्या पुढील भूमिकेकडे सर्वांचे लक्ष लागले आहे.
