तुळजापूर: तुळजापूर बसस्थानकात बसमध्ये चढत असताना गर्दीचा फायदा घेऊन एका अज्ञात महिलेने दुसऱ्या महिलेच्या गळ्यातील ४० हजार रुपये किमतीचे सोन्याचे गंठण चोरून नेल्याची घटना गुरुवारी, दि. ११ सप्टेंबर २०२५ रोजी घडली. याप्रकरणी तुळजापूर पोलीस ठाण्यात अज्ञात चोरट्या महिलेविरुद्ध गुन्हा दाखल करण्यात आला आहे.
याबाबत अधिक माहिती अशी की, संगिता महावीर कंदले (वय ४५, रा. व्होर्टी, ता. तुळजापूर) या गुरुवारी दुपारी अडीच वाजण्याच्या सुमारास तुळजापूर येथून जळकोटला जाण्यासाठी उमरगा बसमध्ये चढत होत्या. बसमध्ये चढत असताना झालेल्या गर्दीचा फायदा घेत एका अज्ञात महिलेने त्यांच्या गळ्यातील १२ ग्रॅम वजनाचे, अंदाजे ४० हजार रुपये किमतीचे सोन्याचे गंठण अलगद चोरले.
आपल्या गळ्यातील गंठण चोरीला गेल्याचे लक्षात येताच संगिता कंदले यांनी तुळजापूर पोलीस ठाण्यात धाव घेऊन तक्रार दाखल केली. त्यांच्या फिर्यादीवरून पोलिसांनी भारतीय न्याय संहिता कलम ३०३(२) अन्वये गुन्हा नोंदवला असून, पुढील तपास सुरू आहे. बसस्थानकातील गर्दीच्या ठिकाणी महिलांनी आपल्या मौल्यवान वस्तू सांभाळाव्यात, असे आवाहन पोलिसांनी केले आहे.
