धाराशिव – धाराशिव जिल्ह्यात झालेल्या अतिवृष्टीमुळे शेतीपिकांचे मोठ्या प्रमाणात नुकसान झाले आहे. या पार्श्वभूमीवर, नुकसानीचे सरसकट पंचनामे करून जिल्ह्यात तातडीने ओला दुष्काळ जाहीर करावा आणि बाधित शेतकऱ्यांना प्रति हेक्टरी ५० हजार रुपयांची आर्थिक मदत द्यावी, अशी जोरदार मागणी राष्ट्रवादी काँग्रेस (शरदचंद्र पवार) पक्षाचे जिल्हाध्यक्ष संजय पाटील दुधगावकर यांनी केली आहे. बुधवारी (दि. १७) पालकमंत्री प्रताप सरनाईक यांना निवेदन देऊन त्यांनी ही मागणी केली.
या निवेदनात दुधगावकर यांनी जिल्ह्यातील भयावह परिस्थिती मांडली आहे. त्यांनी म्हटले आहे की, जिल्ह्यात यंदा प्रथम १४ ते ३० मे २०२५ दरम्यान १६३ मि.मी. पाऊस झाला आणि त्यानंतर १ जून ते १३ सप्टेंबर या कालावधीत सर्वच तालुक्यांमध्ये (कळंब, धाराशिव, वाशी, लोहारा, उमरगा, भूम, परंडा, तुळजापूर) अतिवृष्टी झाली. यामुळे नदी-नाल्यांच्या काठावरील जमिनी खरवडून गेल्या असून, जिल्ह्यातील सुमारे २ लाख ५० हजार हेक्टरवरील पिकांचे, म्हणजेच जवळपास ७५ टक्के पिकांचे नुकसान झाले आहे.
या नैसर्गिक आपत्तीत जिल्ह्यात गेल्या महिन्यात ३ नागरिकांचा आणि ३१६ जनावरांचा मृत्यू झाला आहे, तर ३५० हून अधिक घरांची पडझड झाली आहे. ५०० पेक्षा जास्त गावांना या अतिवृष्टीचा फटका बसला असून, पावसाचे अजून पंधरा दिवस बाकी असल्याने परिस्थिती आणखी गंभीर होण्याची भीती व्यक्त केली जात आहे.
या निवेदनातून शासनाकडे इतरही महत्त्वाच्या मागण्या करण्यात आल्या आहेत:
- सरसकट पंचनामे: नुकसानीचे पंचनामे तातडीने आणि सरसकट पद्धतीने करावेत.
- वीजरोधक यंत्रणा: वीज पडून होणारे मृत्यू टाळण्यासाठी जिल्ह्यात वीजरोधक यंत्रणा बसवावी.
- बससेवा पूर्ववत करा: खराब रस्त्यांचे कारण देत ग्रामीण भागातील बंद करण्यात आलेल्या बससेवा तात्काळ सुरू कराव्यात, जेणेकरून सामान्य नागरिकांची होणारी गैरसोय दूर होईल.
या गंभीर परिस्थितीत शासनाने तातडीने कणखर भूमिका घेऊन शेतकऱ्यांना दिलासा द्यावा, असे आवाहन दुधगावकर यांनी केले आहे. निवेदन देताना त्यांच्यासोबत नामदेव चव्हाण, बालाजी डोंगे, इकबाल पटेल, अनिल जाधव, श्री पाटील आदी पदाधिकारी उपस्थित होते.
