धाराशिव: जिल्ह्यात गुन्हेगारांनी पुन्हा एकदा डोके वर काढले असून, वाशी आणि उमरगा पोलीस ठाण्याच्या हद्दीत लुटमार, घरफोडी आणि मोटारसायकल चोरीच्या गंभीर घटना घडल्या आहेत. एका घटनेत दाम्पत्याला मारहाण करून, चाकूचा धाक दाखवून त्यांची मोटारसायकल पळवण्यात आली, तर दुसऱ्या घटनेत सराफा दुकान फोडून लाखोंचे चांदीचे दागिने लंपास करण्यात आले. या घटनांमुळे नागरिकांमध्ये भीतीचे वातावरण पसरले असून, पोलिसांसमोर गुन्हेगारांना जेरबंद करण्याचे मोठे आव्हान उभे राहिले आहे.
याप्रकरणी वाशी आणि उमरगा पोलीस ठाण्यात भारतीय न्याय संहितेच्या विविध कलमांनुसार गुन्हे दाखल करण्यात आले आहेत.
पारगावजवळ दाम्पत्याला मारहाण करत मोटारसायकल पळवली
वाशी पोलीस ठाण्यात दाखल झालेल्या गुन्ह्यानुसार, फिर्यादी शितल प्रमोद पोपळे (वय २८, रा. बीड, ता. जि. धाराशिव) या दि. २३ ऑक्टोबर २०२५ रोजी पतीसोबत मोटारसायकलवरून जात होत्या. पारगाव टोलनाक्याच्या पुढे आल्या असता, तीन अनोळखी इसमांनी त्यांच्या पाठीवरील बॅग (शॉक) ओढून त्यांना व त्यांच्या पतीला खाली पाडले. त्यानंतर आरोपींनी शिवीगाळ करत लाथाबुक्यांनी मारहाण केली व चाकूचा धाक दाखवून फिर्यादीचे दागिने काढण्यास सुरुवात केली. यावेळी फिर्यादीच्या पतीने एक ट्रॅव्हल्स (बस) थांबवल्याचा राग आल्याने आरोपींनी त्या बसवर दगडफेकही केली. अखेर, आरोपींनी फिर्यादी यांची ४०,००० रुपये किमतीची मोटारसायकल (क्र. एमएच १७ एपी २२८२) घेऊन पळ काढला. याप्रकरणी शितल पोपळे यांनी २४ ऑक्टोबर रोजी दिलेल्या फिर्यादीवरून वाशी पोलीस ठाण्यात भा.न्या.सं. कलम ३०९(४), १२५, ३(५) अन्वये गुन्हा नोंदवण्यात आला आहे.
पुण्याच्या इसमास लुटले; २ लाखांचा ऐवज हिसकावला
वाशी पोलीस ठाण्यात दाखल दुसऱ्या घटनेत, सागर गोविंद शिंदे (वय ३९, रा. हडपसर, पुणे) यांना लुटण्यात आले. दि. १५ ऑक्टोबर २०२५ रोजी सकाळी साडेदहाच्या सुमारास आंद्रुड फाटा येथील रोडवर असताना, एका अनोळखी पुरुष व महिलेने सागर शिंदे यांच्याकडील रोख रक्कम १,५०,००० रुपये आणि एक सॅमसंग कंपनीचा मोबाईल फोन, असा एकूण २,१०,००० रुपयांचा ऐवज हिसकावून घेतला. अनोळखी महिलेने हा ऐवज हिसकावून मोटारसायकलवर बसून पळ काढला. याप्रकरणी सागर शिंदे यांनी २४ ऑक्टोबर रोजी दिलेल्या फिर्यादीवरून वाशी पोलीस ठाण्यात भा.न्या.सं. कलम ३०४(२), ३(५) अन्वये गुन्हा नोंदवला आहे.
कदेर येथे सराफा दुकान फोडून सव्वा दोन लाखांची चांदी लंपास
उमरगा पोलीस ठाण्याच्या हद्दीत घरफोडीचा मोठा गुन्हा घडला आहे. फिर्यादी सुहास रमेश पोतदार (वय ४७, रा. सोनार गल्ली, मुरुम, ता. उमरगा) यांचे कदेर येथे ‘कालीका ज्वेलर्स’ नावाचे दुकान आहे. दि. २४ ऑक्टोबर २०२५ रोजी मध्यरात्री १२ ते पहाटे पावणेचार वाजण्याच्या सुमारास, अज्ञात व्यक्तीने त्यांच्या दुकानाचे शटर उचकटून आत प्रवेश केला. चोरट्यांनी दुकानातील लोखंडी कपाटात ठेवलेले ३ किलो ७३० ग्रॅम वजनाचे चांदीचे दागिने, ज्यांची एकूण किंमत २,२९,४८७ रुपये आहे, चोरून नेले. याप्रकरणी सुहास पोतदार यांनी दिलेल्या फिर्यादीवरून उमरगा पोलीस ठाण्यात भा.न्या.सं. कलम ३३१(४), ३०५(अ) अन्वये गुन्हा नोंदवला आहे.
घरासमोरून मोटारसायकल चोरी
वाशी पोलीस ठाण्यात मोटारसायकल चोरीचा आणखी एक गुन्हा दाखल झाला आहे. फिर्यादी बिरमल किसन देवकते (वय ४८, रा. कन्हेरी, ता. वाशी) यांची ५०,००० रुपये किमतीची हिरो स्प्लेंडर प्लस मोटारसायकल (क्र. एमएच २५ एवाय ७४०१) दि. ५ ऑक्टोबर रोजी रात्री ८ ते दि. ६ ऑक्टोबर रोजी पहाटे ५ वाजण्याच्या दरम्यान त्यांच्या घरासमोरून अज्ञात चोरट्याने चोरून नेली. याप्रकरणी बिरमल देवकते यांनी २४ ऑक्टोबर रोजी दिलेल्या फिर्यादीवरून वाशी पोलीस ठाण्यात भा.न्या.सं. कलम ३०३(२) अन्वये गुन्हा नोंदवला आहे.
या सर्व घटनांप्रकरणी संबंधित पोलीस ठाण्यात गुन्हे दाखल करण्यात आले असून, पोलीस आरोपींचा शोध घेत आहेत.
