कळंब – कळंब शहरातील गजबजलेल्या भागात असलेल्या एका बिअर शॉपीच्या गोडाऊनचा पत्रा उचकटून चोरट्यांनी धाडसी चोरी केल्याची घटना समोर आली आहे. चोरट्यांनी गोडाऊनमधून तब्बल १ लाख ८२ हजार ५२० रुपये किमतीचे बिअरचे ७८ बॉक्स चोरून नेले आहेत. याप्रकरणी १८ नोव्हेंबर रोजी कळंब पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी रंजित रोहीदास हौसलमल (वय ४१, रा. कल्पना नगर, कळंब) यांचे छत्रपती शिवाजी महाराज चौक ते भाजी मंडईकडे जाणाऱ्या रोडवर ‘हौसलमल बिअर शॉपी’ हे दुकान आहे. या दुकानाच्या गोडाऊनमध्ये बिअरचा साठा ठेवण्यात आला होता.
दिनांक १२ नोव्हेंबर २०२५ रोजी रात्री १०:३० ते १३ नोव्हेंबर २०२५ रोजी सकाळी १०:३० वाजेच्या दरम्यान ही घटना घडली. अज्ञात चोरट्यांनी गोडाऊनच्या वरील बाजूचा पत्रा उचकटून आत प्रवेश केला. त्यानंतर गोडाऊनमधील एकूण ७८ बिअरचे बॉक्स (किंमत १,८२,५२० रुपये) चोरून नेले.
या घटनेची फिर्याद रंजित हौसलमल यांनी १८ नोव्हेंबर रोजी कळंब पोलिसांत दिली. त्यावरून अज्ञात चोरट्याविरुद्ध भारतीय न्याय संहिता (BNS) कलम ३३१(४) (घरफोडी) आणि ३०५ (चोरी) अन्वये गुन्हा नोंदवण्यात आला आहे. पुढील तपास कळंब पोलीस करत आहेत.
उमरा शिवारात शेतातील विद्युत मोटारीसह साहित्य चोरी; ३६ हजारांचा मुद्देमाल लंपास
कळंब तालुक्यातील उमरा शिवारातील एका शेतातून अज्ञात चोरट्यांनी विद्युत मोटारीसह केबल आणि इतर साहित्य चोरून नेल्याची घटना उघडकीस आली आहे. याप्रकरणी १८ नोव्हेंबर रोजी येरमाळा पोलीस ठाण्यात चोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी कौशल्या चंद्रकांत जाधव (वय ५७, रा. उमरा, ता. कळंब) यांची उमरा शिवारात शेतजमीन (गट नं. ५८) आहे. या शेतात पाण्यासाठी विद्युत मोटार बसवण्यात आली होती.
दिनांक २५ ऑक्टोबर २०२५ रोजी सायंकाळी ६:०० ते ५ नोव्हेंबर २०२५ रोजी सकाळी १०:३० वाजेच्या दरम्यान ही चोरीची घटना घडली. अज्ञात चोरट्यांनी शेतातून ७.५ एच.पी. क्षमतेची विद्युत मोटार, १०० मीटर केबल वायर आणि रोटोसोल कंपनीचा मोटारीचा पंखा असा एकूण ३६ हजार रुपये किमतीचा ऐवज चोरून नेला.
याप्रकरणी कौशल्या जाधव यांनी दिलेल्या फिर्यादीवरून येरमाळा पोलीस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३०३(२) अन्वये गुन्हा नोंदवण्यात आला आहे. पुढील तपास येरमाळा पोलीस करत आहेत.
