तुळजापूर: काँग्रेसचे उमेदवार अमर मगर यांचे चुलत बंधू कुलदीप मगर यांच्यावर झालेल्या जीवघेण्या हल्ला प्रकरणाने आता तीव्र राजकीय वळण घेतले आहे. एकीकडे महाविकास आघाडीचे नेते आणि ऋषी मगर यांनी भाजपचे नगराध्यक्षपदाचे उमेदवार विनोद उर्फ पिटू गंगणे हेच या हल्ल्याचे ‘मास्टरमाईंड’ असल्याचा आरोप करत त्यांना सहआरोपी करण्याची मागणी लावून धरली आहे. तर दुसरीकडे, आता पिटू गंगणे यांच्या बचावासाठी भाजप कार्यकर्ते मैदानात उतरले असून त्यांनी पोलिसांना निवेदन देत “राजकीय दबावापोटी निष्पाप व्यक्तींना गुन्ह्यात गोवू नका,” अशी मागणी केली आहे.
पिटू गंगणे यांच्या अडचणीत वाढ?
विनोद उर्फ पिटू गंगणे हे भाजपचे नगराध्यक्षपदाचे उमेदवार असून ते याआधीच ड्रग्ज प्रकरणातील आरोपी आहेत. जर कुलदीप मगर हल्ला प्रकरणात त्यांचे नाव एफआयआर (FIR) मध्ये समाविष्ट झाले, तर त्यांची जामिनावर असलेली सुटका रद्द होऊ शकते आणि त्यांना पुन्हा जेलमध्ये जावे लागू शकते, अशी भीती भाजप कार्यकर्त्यांना आहे. त्यामुळेच गंगणे यांना वाचवण्यासाठी समर्थकांनी थेट पोलीस ठाणे गाठले आहे.
भाजप कार्यकर्त्यांचे निवेदन काय?
भाजप समर्थकांनी आज तुळजापूरचे पोलीस निरीक्षक अन्नासाहेब मांजरे यांना निवेदन दिले (जे मूळ पोलीस अधीक्षक, धाराशिव यांच्या नावे आहे). या निवेदनात त्यांनी म्हटले आहे:
-
कुलदीप मगर यांच्यावर झालेला हल्ला निषेधार्ह असून आरोपींवर कठोर कारवाई व्हावी.
-
मात्र, या घटनेत राजकीय विरोधक नगराध्यक्षपदाचे उमेदवार विनोद भैय्या गंगणे यांचे नाव गुन्ह्यात घेण्याचा प्रयत्न करत आहेत.
-
पोलिसांनी कोणाच्याही राजकीय दबावाला बळी न पडता, घटनेच्या दिवशीचे सीसीटीव्ही फुटेज (CCTV) आणि सीडीआर (CDR) तपासूनच योग्य ती कार्यवाही करावी. विनाकारण निर्दोष व्यक्तीचे नाव गुन्ह्यात घेऊ नये, अशी विनंती करण्यात आली आहे.
महाविकास आघाडीची आक्रमक भूमिका
दुसरीकडे, महाविकास आघाडी आणि मगर कुटुंबीय आपल्या मागणीवर ठाम आहेत. अटकेत असलेले आरोपी हे पिटू गंगणे यांचे समर्थक असून, हल्ल्याच्या वेळी आरोपींनी “पिटू गंगणेच्या विरोधात प्रचार का केला?” असे विचारल्याचे फिर्यादीत स्पष्ट आहे. त्यामुळे या टोळीचा मुख्य सूत्रधार म्हणून गंगणे यांना तात्काळ अटक करावी, अशी मागणी ऋषी मगर यांनी केली आहे.
तपासाची सद्यस्थिती
-
आरोपी: या प्रकरणात आतापर्यंत ७ आरोपींना अटक करण्यात आली असून त्यांना २३ डिसेंबरपर्यंत पोलीस कोठडी सुनावण्यात आली आहे.
-
फरार: गोळीबार करणारा मुख्य शूटर सूरज साठे अद्याप फरार आहे.
-
दबाव: दोन्ही बाजूंच्या परस्परविरोधी मागण्यांमुळे तुळजापूर पोलिसांवर तपासाचा आणि कारवाईचा मोठा दबाव निर्माण झाला आहे.
आता पोलीस सीसीटीव्ही, कॉल रेकॉर्ड्स आणि पुरवणी जबाब यांच्या आधारे काय निर्णय घेतात, आणि पिटू गंगणे यांच्यावर कारवाई होते की त्यांना दिलासा मिळतो, याकडे संपूर्ण तुळजापूरचे लक्ष लागले आहे.
