तुळजापूर: महाराष्ट्राची कुलस्वामिनी आई तुळजाभवानी मातेच्या शाकंभरी नवरात्र महोत्सवास आज (मंगळवारी) दुपारी १२ वाजता विधिवत घटस्थापनेने आणि भक्तिमय वातावरणात प्रारंभ झाला. तुळजापुरात ‘धाकटा दसरा’ म्हणून ओळखल्या जाणाऱ्या या उत्सवामुळे मंदिर परिसर भक्तीने दुमदुमून गेला आहे.
घटस्थापना सोहळा
आज दुपारी १२ वाजता मंदिरातील गणेश विहारात मुख्य यजमान उल्हास अनंतराव कागदे यांच्या हस्ते सपत्नीक आणि विधिवत घटस्थापना करण्यात आली. या मंगलमय प्रसंगी तहसीलदार तथा मंदिर व्यवस्थापक (प्रशासन) माया माने, महंत तुकोजी बुवा, महंत चिलोजी बुवा, महंत वाकोजी बुवा, उपाध्ये सुनीत (बंडू) पाठक, पुजारी मंडळाचे अध्यक्ष विपिन शिंदे, अमराराजे कदम, अनंत कोंडो, लेखाधिकारी संतोष भेंकी, सहायक धार्मिक व्यवस्थापक अनुप ढमाले यांच्यासह मंदिर संस्थानचे अधिकारी, कर्मचारी, पुजारी आणि भाविक मोठ्या संख्येने उपस्थित होते.
मंचकी निद्रा समाप्त
नवरात्र सुरू होण्यापूर्वी गेल्या आठ दिवसांपासून देवीची मंचकी निद्रा सुरू होती. ती संपवून आज पहाटे पौष शुक्ल अष्टमीच्या शुभमुहूर्तावर श्री तुळजाभवानी मातेची सिंहासनावर विधिवत प्रतिष्ठापना करण्यात आली. त्यानंतर दुपारी घटस्थापना होऊन उत्सवाला सुरुवात झाली.
अलंकार महापूजा आणि कार्यक्रम
पुढील सात दिवस चालणाऱ्या या उत्सवात देवीची विविध रूपे भक्तांना पाहायला मिळणार आहेत:
-
२९ डिसेंबर: रथ अलंकार महापूजा
-
३० डिसेंबर: मुरली अलंकार महापूजा
-
३१ डिसेंबर: शेषशाही अलंकार महापूजा (तसेच सकाळी ७ वा. जलयात्रा)
-
१ जानेवारी: भवानी तलवार अलंकार महापूजा
-
२ जानेवारी: महिषासुरमर्दिनी अलंकार महापूजा
या काळात दररोज रात्री देवीचा छबीना (मिरवणूक) काढण्यात येणार आहे.
उत्सवाची सांगता
या शाकंभरी नवरात्र महोत्सवाची सांगता ३ जानेवारी रोजी शाकंभरी पौर्णिमेला दुपारी १२ वाजता पूर्णाहुती आणि घटोत्थापनाने होणार आहे. संपूर्ण तुळजापूर नगरी सध्या भक्ती, श्रद्धा आणि उत्सवाच्या रंगात न्हाऊन निघाली आहे.
