धाराशिव: जिल्ह्यात मागील काही दिवसांत चोरीच्या घटनांमध्ये वाढ झाली असून, एकाच दिवशी विविध पोलीस ठाण्यांत चोरीचे चार गुन्हे दाखल झाले आहेत. शिराढोण येथे चोरट्यांनी मोटर वाइंडिंगच्या दुकानाचे पत्रे उचकटून अडीच लाखांची तांब्याची तार लंपास केली, तर शेतकऱ्याच्या विहिरीवरील सोलर पंप आणि दोन वेगवेगळ्या ठिकाणांवरून मोटारसायकली चोरीला गेल्याच्या घटना समोर आल्या आहेत.
याबाबत सविस्तर वृत्त असे की:
शिराढोणमध्ये अडीच लाखांची घरफोडी
शिराढोण टी-पॉईंट येथे असलेल्या ‘चाटे मोटर वाइंडिंग’ या दुकानात मोठी चोरी झाली आहे. बळीराम बिभीषण चाटे (वय ३४, रा. ताडगाव, ता. कळंब) यांचे हे दुकान आहे. १५ जानेवारीच्या रात्री साडेनऊ ते १६ जानेवारीच्या सकाळी साडेनऊच्या दरम्यान अज्ञात चोरट्यांनी दुकानाचे पत्रे उचकटून आत प्रवेश केला. चोरट्यांनी दुकानातील २५० ते ३०० किलो वजनाची जुनी व नवीन कॉपर वाइंडिंग वायर (अंदाजे किंमत २ लाख ५० हजार रुपये) चोरून नेली. याप्रकरणी शिराढोण पोलीस ठाण्यात भारतीय न्याय संहिता (BNS) कलम ३३१(१) आणि ३०५ अन्वये गुन्हा दाखल करण्यात आला आहे.
शेतकऱ्याची सोलर पानबुडी चोरीला
शिराढोण शिवारातच दुसरी चोरीची घटना घडली आहे. ताडगाव येथील शेतकरी वैजनाथ बन्सी जाधवर (वय ३१) यांच्या गट नं. १५५ मधील विहिरीवर बसवलेली ‘शक्ती’ कंपनीची २० हजार रुपये किमतीची सोलर पानबुडी (सबमर्सिबल पंप) चोरट्यांनी लंपास केली. ही घटना १५ ते १६ जानेवारी दरम्यान घडली. याप्रकरणी शिराढोण पोलीस ठाण्यात BNS कलम ३०३(२) अन्वये गुन्हा नोंदवण्यात आला आहे.
समर्थ नगरमधून स्प्लेंडर गायब
धाराशिव शहरातील समर्थ नगर, काबळे निवास येथून अर्जुन शिवाजी आगळे (वय ३२, रा. विकासनगर) यांची २० हजार रुपये किमतीची हिरो होंडा स्प्लेंडर प्लस (क्र. एमएच १३, एडब्ल्यु ८५९१) ही दुचाकी चोरीला गेली आहे. २ जानेवारीच्या रात्री ही चोरी झाली होती. याप्रकरणी आनंदनगर पोलीस ठाण्यात १७ जानेवारी रोजी गुन्हा दाखल करण्यात आला आहे.
करजखेडा येथूनही दुचाकी लंपास
तुळजापूर तालुक्यातील करजखेडा येथील अन्नछत्रासमोरील रस्त्यावरून लहु सुनील कोळेकर (वय ३२, रा. काक्रंबावाडी) यांची एचएफ डीलक्स (क्र. एमएच २५, एजी ४०४५) ही दुचाकी चोरीला गेली. ३१ डिसेंबर २०२५ च्या रात्री अवघ्या १५ मिनिटांत चोरट्यांनी ही ३० हजार रुपयांची गाडी पळवून नेली. याप्रकरणी बेंबळी पोलीस ठाण्यात गुन्हा नोंदवण्यात आला आहे.
पोलीस या सर्व गुन्ह्यांचा अधिक तपास करत आहेत.
