धाराशिव: येथील मध्यवर्ती बसस्थानकावर बसमध्ये चढत असताना गर्दीचा फायदा घेऊन एका महिलेच्या पर्समधील ८० हजार रुपये किमतीचे सोन्याचे दागिने चोरल्याची घटना उघडकीस आली आहे. याप्रकरणी एका संशयित महिलेविरुद्ध आनंदनगर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी स्नेहा मिनुनाथ फिरके (वय ३०, रा. मलेरिया कॉलनी, तेरणा पब्लिक स्कूल जवळ, धाराशिव) या १० फेब्रुवारी २०२६ रोजी सकाळी ८.३० च्या सुमारास धाराशिव बसस्थानकावर आल्या होत्या. त्या तुळजापूर ते सोलापूर या बसमध्ये चढत असताना प्रवाशांची मोठी गर्दी झाली होती.
याच गर्दीचा फायदा घेत आरोपी दिपाली काळे (रा. साठेनगर, धाराशिव) हिने फिर्यादी स्नेहा यांच्या पर्समधील ४ तोळे वजनाचे सोन्याचे दागिने (एकुण किंमत ८०,००० रुपये) हातचलाखीने चोरून नेले. दागिने चोरीला गेल्याचे लक्षात आल्यानंतर स्नेहा फिरके यांनी ११ फेब्रुवारी २०२६ रोजी पोलिसांत धाव घेतली.
त्यांनी दिलेल्या फिर्यादीवरून आनंदनगर पोलीस ठाण्यात आरोपी दिपाली काळे हिच्याविरुद्ध भारतीय न्याय संहिता (BNS) कलम ३०३(२) अन्वये चोरीचा गुन्हा दाखल करण्यात आला आहे. या प्रकरणाचा पुढील तपास पोलीस करत आहेत.
तुळजापुरात दर्शनासाठी आलेल्या भाविक महिलेचे सव्वा लाखांचे दागिने चोरीला
तुळजापूर: कुलस्वामिनी तुळजाभवानी मातेच्या दर्शनासाठी आलेल्या बारामती येथील एका महिलेचे १ लाख २६ हजार रुपये किमतीचे सोन्याचे दागिने चोरीला गेल्याची घटना उघडकीस आली आहे. याप्रकरणी चिंचोली येथील एका व्यक्तीविरुद्ध तुळजापूर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी मनिषा मानसिंग सुळ (वय ३४, रा. जळोची, ता. बारामती, जि. पुणे) या रविवारी, ८ फेब्रुवारी २०२६ रोजी सकाळी १०.४८ वाजण्याच्या सुमारास तुळजापूर येथे दर्शनासाठी आल्या होत्या. त्या येथील पुजारी सुधाकर आनंदराव चोपदार यांच्या काउंटरवर थांबल्या असता, आरोपी विष्णु भरत बनसोडे (रा. चिंचोली) याने त्यांची नजर चुकवून दागिने चोरले.
चोरट्याने मनिषा सुळ यांचे १७ ग्रॅम वजनाचे सोन्याचे मिनी गंठण आणि ४ ग्रॅम वजनाचे झुमके असा एकूण १,२६,००० रुपये किमतीचा ऐवज लंपास केला.
याबाबत मनिषा सुळ यांनी ११ फेब्रुवारी २०२६ रोजी तुळजापूर पोलीस ठाण्यात धाव घेऊन तक्रार दाखल केली. त्यांच्या फिर्यादीवरून पोलिसांनी आरोपी विष्णु बनसोडे याच्याविरुद्ध भारतीय न्याय संहिता (BNS) कलम ३०३(२) अन्वये गुन्हा दाखल केला आहे. या प्रकरणाचा पुढील तपास तुळजापूर पोलीस करत आहेत.
येरमाळा बसस्थानकावर प्रवासादरम्यान वृद्ध महिलेचे दागिने लंपास
येरमाळा: सोलापूरला जाण्यासाठी बसमध्ये बसलेल्या एका वृद्ध महिलेच्या पर्समधील ४० हजार रुपये किमतीचे सोन्याचे दागिने अज्ञात चोरट्याने लंपास केल्याची घटना येरमाळा बसस्थानकावर घडली आहे. याप्रकरणी येरमाळा पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी पांडुरंग नारायण भगत (वय ७२, रा. रत्नापूर, ता. कळंब, जि. धाराशिव) यांची पत्नी आणि मुलगी या दोघी रविवारी, ८ फेब्रुवारी २०२६ रोजी सकाळी ९.४५ च्या सुमारास प्रवासासाठी निघाल्या होत्या. सोलापूरला जाण्यासाठी त्या येरमाळा बसस्थानकावर आल्या आणि संभाजीनगर-सोलापूर या बसमध्ये बसल्या.
प्रवासाच्या गडबडीत असताना अज्ञात चोरट्याने फिर्यादीची पत्नी सुमन यांच्या पर्समधील ७ ग्रॅम वजनाचे सोन्याचे दागिने (किंमत अंदाजे ४०,००० रुपये) हातचलाखीने चोरून नेले. हा प्रकार लक्षात आल्यानंतर पांडुरंग भगत यांनी ११ फेब्रुवारी २०२६ रोजी पोलिसांत धाव घेतली.
त्यांच्या फिर्यादीवरून येरमाळा पोलीस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला आहे. बसस्थानकावरील गर्दीचा फायदा घेत ही चोरी झाल्याचा संशय असून पोलीस पुढील तपास करत आहेत.
