धाराशिव: धाराशिव पोलीस दलात सध्या ‘आओ जाओ घर तुम्हारा’ अशी स्थिती झाली आहे की काय, असा प्रश्न उपस्थित होत आहे. काही दिवसांपूर्वीच जिल्हा पोलीस अधीक्षक (SP) मॅडम यांनी बदली होऊनही वर्षानुवर्षे एकाच खुर्चीला चिटकून बसलेल्या आणि ‘तळ’ ठोकणाऱ्या पोलीस कर्मचाऱ्यांचे चांगलेच कान उपटले होते. बदलीच्या ठिकाणी तात्काळ हजर व्हा, अन्यथा कारवाईला सामोरे जा, असा सज्जड दमच मॅडम्सनी भरला होता. मात्र, तुळजापूर पोलीस ठाण्यातील एका ‘गुटखा वसूलदारा’ने या आदेशाला चक्क वाटाण्याच्या अक्षता लावल्याची चर्चा सध्या जोरात आहे.
बदली होऊन वर्ष लोटले, तरी तुळजापूरमधील हा ‘साहेबांच्या ताटाखालचा मांजर’ उमरग्याला हलायला तयार नाही. “जुन्या केसेस पेंडिंग आहेत,” असे गोंडस कारण पुढे करत साहेब आपल्या या ‘खास’ माणसाला सोडायला तयार नाहीत. पण, आतली बातमी वेगळीच आहे. हा महाशय साहेबांचा केवळ खबऱ्याच नाही, तर ‘गुटखा वसुली’तला मुख्य कणा असल्याचे बोलले जात आहे.
तुळजापुरात चालणारी ही अवैध वसुली नेमकी कुणाच्या ‘छत्रछायेखाली’ सुरू आहे, हे काही तुळजापूरकरांपासून लपून राहिलेले नाही. पण प्रश्न हा आहे की, ज्या SP मॅडम्सनी शिस्तीचा बडगा उगारला होता, त्या या प्रकरणावर गप्प का? ‘साहेब’ या वसुली बहाद्दरावर एवढे मेहेरबान का? आणि कारवाईचे फर्मान फक्त सर्वसामान्यांसाठीच असते का? असे तिखट सवाल आता पोलीस वर्तुळात आणि नागरिकांमध्ये चर्चिले जात आहेत.
थोडक्यात:
-
एसपींचा आदेश हवेत: बदली झालेल्यांनी तत्काळ रुजू होण्याचे आदेश, पण तुळजापुरात अंमलबजावणी शून्य.
-
दोन कारणे, एक सत्य: जुन्या केसेसचे निमित्त, पण खरी मेख गुटखा वसुलीत?
-
चर्चा तर होणारच: बदली होऊन वर्ष झाले तरी ‘ते’ महाशय तुळजापुरातच; साहेबांना नक्की मोह कशाचा?
