उमरगा : शेतातील बंधारा टोकरण्याच्या कारणावरून झालेल्या वादातून एका २२ वर्षीय तरुणाला शिवीगाळ करत लोखंडी कोयता, हंटरची लोखंडी साखळी आणि कमरेच्या बेल्टने बेदम मारहाण केल्याची धक्कादायक घटना उमरगा तालुक्यातील एकोंडी (ज.) येथे घडली आहे. या अमानुष हल्ल्यात तरुण गंभीर जखमी झाला असून, याप्रकरणी उमरगा पोलीस ठाण्यात पाच जणांवर गुन्हा दाखल करण्यात आला आहे.
अभिषेक नेताजी बिराजदार (वय २२ वर्षे, रा. एकोंडी ज., ता. उमरगा) असे गंभीर जखमी झालेल्या फिर्यादी तरुणाचे नाव आहे. याप्रकरणी गुरप्पा प्रभू बिराजदार, ईरबस प्रभू बिराजदार, रुद्रप्पा प्रभू बिराजदार, मंगेश रुद्रप्पा बिराजदार (सर्व रा. एकोंडी ज., ता. उमरगा) आणि महेश देशमुख ऊर्फ बुड्डा (रा. गुंजोटी, ता. उमरगा) अशी गुन्हा दाखल झालेल्या पाच आरोपींची नावे आहेत.
पोलिसांकडून मिळालेल्या माहितीनुसार, रविवार, १५ फेब्रुवारी २०२६ रोजी रात्री सव्वानऊ (२१:१५) वाजण्याच्या सुमारास एकोंडी (ज.) गावातील पाण्याच्या टाकीसमोर हा प्रकार घडला. फिर्यादी अभिषेक बिराजदार आणि आरोपी यांच्यात शेतातील बंधारा टोकरण्याच्या कारणावरून वाद निर्माण झाला होता. याच रागातून पाचही आरोपींनी एकत्र येत अभिषेकला गाठले. सुरुवातीला त्यांनी शिवीगाळ करत लाथाबुक्क्यांनी मारहाण करण्यास सुरुवात केली. त्यानंतर आरोपींनी लोखंडी कोयता, हंटरची लोखंडी चैन आणि कमरेच्या बेल्टने बेदम मारहाण करून अभिषेकला गंभीर जखमी केले.
या घटनेनंतर फिर्यादी अभिषेक बिराजदार यांनी गुरुवारी, १९ फेब्रुवारी २०२६ रोजी उमरगा पोलीस ठाण्यात जाऊन यासंदर्भात तक्रार दिली. त्यांच्या या प्रथम खबरेवरून पोलिसांनी सर्व पाचही आरोपींविरुद्ध भारतीय न्याय संहिता (BNS) कलम १८९(२), १९१(२), १९१(३), १९०, ११८(१), ११८(२), ३५१(२)(३) आणि ३५२ अन्वये गुन्हा नोंदवला आहे. या प्रकरणाचा पुढील तपास उमरगा पोलीस करत आहेत.
