कळंब : शाळकरी मुलीची छेडछाड भोवली; आरोपीला ४ वर्षे सक्तमजुरीची शिक्षा

कळंब शाळकरी मुलीचा पाठलाग करून तिची छेडछाड करणे आणि तिच्या कुटुंबीयांना मारहाण करून जीवे मारण्याची धमकी देणे एका रोडरोमियोला चांगलेच भोवले आहे. या प्रकरणी कळंब जिल्हा व सत्र न्यायालयाने आरोपी महेश महादेव कदम याला ४ वर्षे १ महिना सक्तमजुरी आणि २ हजार ५०० रुपये दंडाची शिक्षा सुनावली आहे. न्यायाधीश आर. के. राजेभोसले यांनी आज (२७ फेब्रुवारी २०२६) हा महत्त्वपूर्ण निकाल दिला. या खटल्यात सरकारपक्षातर्फे अतिरिक्त जिल्हा सरकारी वकील ॲड. आशिष कुलकर्णी यांनी भक्कमपणे बाजू मांडली.

काय आहे नेमके प्रकरण?

कळंब तालुक्यातील एका गावात २५ एप्रिल २०२३ रोजी ही घटना घडली होती. सायंकाळी ७ वाजण्याच्या सुमारास पीडित मुलगी गावातील प्रमोद पवार यांच्या किराणा दुकानातून साखर घेऊन घरी परतत होती. त्यावेळी रस्त्यात लोमटे यांच्या घरासमोर राहणाऱ्या आरोपी महेश महादेव कदम याने तिला अडवले. त्याने पीडितेचा हात पकडून “तू मला आवडतेस, माझ्याशी बोलत जा,” अशी जबरदस्ती केली. पीडितेने त्याला ठणकावून सांगत आई-वडिलांना नाव सांगण्याची ताकीद दिली. त्यावर आरोपी महेशने तिला आणि तिच्या आई-वडिलांना व भावाला जीवे मारण्याची धमकी दिली.

या घटनेपूर्वीही सलग एक महिना आरोपी महेश हा पीडित मुलगी शाळेत येता-जाता तिचा पाठलाग करून तिला त्रास देत असे. या सर्व प्रकाराला कंटाळून पीडितेने घडलेला प्रकार आपल्या आई-वडिलांना सांगितला. संतापलेले आई-वडील जेव्हा आरोपीला जाब विचारण्यासाठी गेले, तेव्हा आरोपीने त्यांनाच मारहाण केली.

६ साक्षीदारांची साक्ष ठरली महत्त्वाची

याप्रकरणी पीडितेच्या तक्रारीवरून शिराढोण पोलीस ठाण्यात आरोपीविरुद्ध गुन्हा दाखल करण्यात आला होता. या गुन्ह्याचा तपास सहाय्यक पोलीस निरीक्षक नेहरकर आणि पुजारवाड यांनी करून कळंब जिल्हा व सत्र न्यायालयात दोषारोपपत्र दाखल केले.

सुनावणीदरम्यान सरकार पक्षातर्फे एकूण ६ साक्षीदार तपासण्यात आले. यामध्ये पीडित मुलीची साक्ष आणि इतर प्रत्यक्षदर्शींचे पुरावे अत्यंत महत्त्वपूर्ण ठरले. या पुराव्यांच्या आधारे न्यायाधीश आर. के. राजेभोसले यांनी आरोपी महेश कदम याला दोषी ठरवत ४ वर्षे १ महिना सक्तमजुरीची आणि दंडाची शिक्षा सुनावली.

 ठळक मुद्दे:

• आरोपीचे नाव: महेश महादेव कदम

• न्यायालय: कळंब जिल्हा व सत्र न्यायालय (न्यायाधीश आर. के. राजेभोसले)

• शिक्षा: ४ वर्षे १ महिना सक्तमजुरी आणि ₹२,५०० दंड

• सरकारी वकील: अतिरिक्त जिल्हा सरकारी वकील ॲड. आशिष कुलकर्णी

• पोलीस ठाणे: शिराढोण पोलीस ठाणे (तपास अधिकारी: सपोनि नेहरकर व पुजारवाड)