तामलवाडी: तुळजापूरकडे पायी चालत जाणाऱ्या एका ३२ वर्षीय महिलेला ‘तुळजापूरला सोडतो’ असा बहाणा करत दुचाकीवर बसवले आणि ज्वारीच्या शेतात नेऊन बंदुकीचा धाक दाखवत तिच्यावर लैंगिक अत्याचार केल्याची अत्यंत धक्कादायक आणि संतापजनक घटना समोर आली आहे. याप्रकरणी तामलवाडी पोलीस ठाण्यात नराधमावर अॅट्रॉसिटी आणि आर्म्स अॅक्टसह विविध गंभीर कलमांन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना शुक्रवार, दिनांक २७ फेब्रुवारी २०२६ रोजी घडली. पीडित ३२ वर्षीय महिला (सुरक्षेच्या कारणास्तव नाव आणि गाव गोपनीय) या तुळजापूरच्या दिशेने पायी चालत जात होत्या. त्यावेळी त्यांच्याच गावातील एका तरुणाने त्यांच्याजवळ दुचाकी आणली आणि ‘चल, तुला तुळजापूर येथे सोडतो’ असे म्हणत त्यांना विश्वासात घेतले व स्वतःच्या मोटारसायकलवर बसवून नेले.
मात्र, तुळजापूरच्या वाटेवर या तरुणाने गाडी एका ज्वारीच्या शेताकडे वळवली. शेतात नेल्यानंतर त्याने स्वतःजवळील बंदूक काढून महिलेला धाक दाखवला. आरडाओरडा करू नये म्हणून तिचे तोंड दाबले आणि जिवे मारण्याची धमकी देत पीडितेवर बळजबरीने लैंगिक अत्याचार केला.
या भयंकर प्रसंगानंतर पीडित महिलेने धैर्याने तामलवाडी पोलीस ठाणे गाठून या घटनेची सविस्तर तक्रार दिली. पीडितेने २७ फेब्रुवारी २०२६ रोजी दिलेल्या प्रथम खबरीवरून, तामलवाडी पोलिसांनी आरोपी तरुणाविरुद्ध भारतीय न्याय संहिता (भा.न्या.सं.) कलम ६४(१) (बलात्कार), ३५१(२), ३५१(३), तसेच अनुसूचित जाती आणि अनुसूचित जमाती (अत्याचार प्रतिबंधक) कायदा (अॅट्रॉसिटी ॲक्ट) कलम ३(२)(v), ३(२)(va) आणि शस्त्र अधिनियम (Arms Act) कलम ३, २५ अन्वये अत्यंत गंभीर स्वरूपाचा गुन्हा नोंदवला आहे. या प्रकरणाचा पुढील तपास पोलीस करत आहेत.
