धाराशिव : धाराशिव जिल्ह्यात भुरट्या आणि मोठ्या चोरांचा सुळसुळाट वाढला असून, जिल्ह्यातील विविध पोलीस ठाण्यांमध्ये एकाच दिवशी चोरीचे तब्बल सहा गुन्हे दाखल झाले आहेत. यामध्ये वाशी तालुक्यात पवनचक्कीचे मोठे नुकसान करत लाखो रुपयांचा मुद्देमाल लंपास करण्यात आला आहे, तर बस प्रवासात एका वृद्ध महिलेचे ४ लाखांचे सोने चोरीला गेले आहे. याशिवाय हॉटेल फोडणे, दुचाकी, बैल आणि केबल चोरीच्या घटनाही समोर आल्या आहेत.
जिल्ह्यात घडलेल्या गुन्ह्यांचा सविस्तर तपशील खालीलप्रमाणे:
पवनचक्कीची तोडफोड; ५ लाखांची चोरी आणि २० लाखांचे नुकसान
वाशी तालुक्यातील शेत गट नं १३५/अ मधील पवनचक्की लोकेशन (SRT 52) येथे ३१ जानेवारी ते १ फेब्रुवारी दरम्यान अज्ञात चोरट्यांनी ट्रान्सफॉर्मरमधील तांब्याची कॉइल, पट्ट्या आणि १५१० लिटर ऑईल असा एकूण ५,०५,९०० रुपयांचा माल चोरून नेला. तसेच, बाजूला असलेल्या यूएसएस यार्डमध्ये (इलेक्ट्रिकल ट्रान्सफॉर्मर) तोडफोड करून कंपनीचे अंदाजे २० लाख रुपयांचे नुकसान केले. याप्रकरणी सिक्युरिटी गार्ड संतोष राम शिंगटे (वय ४६, रा. दहिफळ) यांनी दिलेल्या तक्रारीवरून २७ फेब्रुवारी रोजी वाशी पोलीस ठाण्यात गुन्हा दाखल करण्यात आला आहे.
एसटी बसमध्ये वृद्ध महिलेचे सव्वाचार लाखांचे दागिने चोरीला
मसुराबाई जगन्नाथ करांडे (वय ८०, रा. आदर्शनगर, बीड) या त्यांच्या मुलीसोबत २० फेब्रुवारी रोजी सकाळी ११ वाजेच्या सुमारास एसटी बसमध्ये चढत होत्या. गर्दीचा फायदा घेत स्कार्फ बांधलेल्या दोन अनोळखी महिलांनी त्यांच्या मुलीच्या पर्सची चेन उघडून ६९ ग्रॅम वजनाचे सोन्याचे दागिने (किंमत ४,१४,००० रुपये) चोरून नेले. याप्रकरणी वाशी पोलीस ठाण्यात गुन्हा दाखल करण्यात आला आहे.
हॉटेल फोडून ३० हजारांचा ऐवज लंपास
खेड (ता. धाराशिव) येथील बळीराम तुकाराम गरड (वय ४२) यांच्या धाराशिव येथील ‘प्रथमेश हॉटेल’मध्ये (अक्षता मंगल कार्यालयाच्या बाजूला) २४ फेब्रुवारी रोजी मध्यरात्री १ वाजेच्या सुमारास अज्ञातांनी प्रवेश केला. चोरांनी मोबाईल फोन, डिव्हीआर, हार्डडिस्क, राउटर, व्हिडिओकॉन एलईडी आणि रोख रक्कम असा एकूण ३० हजारांचा माल चोरून नेला. याप्रकरणी धाराशिव शहर पोलिसांत गुन्हा दाखल झाला आहे.
तुळजापुरात घरासमोरून ९० हजारांची स्कूटी चोरीला:
निशा किरण साठे (वय २६, रा. वासुदेव गल्ली, तुळजापूर) यांची ९० हजार रुपये किमतीची ‘ज्युपिटर’ स्कूटी (MH 25 BC 1758) २७ फेब्रुवारी रोजी पहाटे पावणेचार वाजेच्या सुमारास त्यांच्या राहत्या घरासमोरून अज्ञात व्यक्तीने चोरून नेली. याप्रकरणी तुळजापूर पोलीस ठाण्यात गुन्हा नोंदवण्यात आला आहे.
शेतशिवारातून ४ बैल चोरीला
सुंदरवाडी (ता. उमरगा) येथील रवींद्र ज्ञानदेव घुळे (वय ६५) यांचे नाईकनगर (सु. चिंचोली) शिवारातील शेतात बांधलेले दोन बैल आणि शेजारील जैनोद्दीन शेख यांचे दोन बैल असे एकूण ५४ हजार रुपये किमतीचे ४ बैल २४ फेब्रुवारी रोजी मध्यरात्री अज्ञात व्यक्तीने चोरून नेले. याप्रकरणी मुरुम पोलीस ठाण्यात गुन्ह्याची नोंद झाली आहे.
तेरणा धरणावरील केबल चोरीप्रकरणी तिघांवर गुन्हा
करजगाव (ता. लोहारा) येथील शेतशिवारातील तेरणा धरणावर असलेली मनोज नागनाथ बेडगे (वय ३०) यांची ५० फूट आणि लहू जाधव यांची १०० फूट अशी एकूण १५ हजारांची केबल २६ फेब्रुवारी रोजी चोरीला गेली. याप्रकरणी रमजान लालडेसाब मुंगळे, मुजीर खानलाब, खलीद मशाक (सर्व रा. जमालनगर, औसा, जि. लातूर) यांनी ही चोरी केल्याच्या फिर्यादीवरून लोहारा पोलीस ठाण्यात गुन्हा दाखल करण्यात आला आहे.
