धाराशिव: धाराशिव जिल्हा परिषदेच्या सत्तास्थापनेवरून सुरू असलेल्या राजकीय नाट्यात आता भाजप आमदार राणा जगजितसिंह पाटील यांना शिवसेनेने चहुबाजूंनी कोंडीत पकडले आहे. पत्नीला झेडपी अध्यक्ष करण्याच्या घाईत असलेल्या राणा पाटलांनी आखलेला ‘सहलीचा’ डाव फसला असून, सोशल मीडियावर ‘पेड’ कार्यकर्त्यांकरवी पेरलेल्या खोट्या बातम्यांचीही आता सप्रमाण पोलखोल झाली आहे.
सहल आटोपली… खर्च झेपेना आणि सदस्य कंटाळले
आमदार राणा पाटील यांनी भाजप, राष्ट्रवादी, काही अपक्ष आणि शिवसेनेचे दोन सदस्य सोबत घेऊन थेट ‘सहल’ काढली होती. मात्र, निकाल लागून एक महिना उलटला तरी अध्यक्ष निवडीचा कार्यक्रम जाहीर न झाल्याने सदस्य अक्षरशः कंटाळले. दुसरीकडे, या ‘विमानवारी’ आणि पंचतारांकित हॉटेलचा वाढता खर्च झेपेनासा झाल्याने अखेर सर्व सदस्य गुपचूप धाराशिवला परतले आहेत.
शिवसेनेची अट आणि राणा पाटलांची माघार
सध्या भाजपकडे बहुमत नाही आणि शिवसेनेकडे निर्णायक संख्याबळ आहे (ज्यात तानाजी सावंत यांचे ८ सदस्य आहेत). राणा पाटलांनी शिवसेनेचे दोन सदस्य – सुनील बनसोडे (शहापूर) आणि पूजा शिंदे (डिकसळ) यांना सोबत नेले होते. यावर शिवसेना शिंदे गटाचे प्रवक्ते योगेश केदार आणि युवासेना नेते अविनाश खोपे-पाटील यांनी कडाडून टीका करत, “पळवून नेलेले सदस्य आधी उपमुख्यमंत्री एकनाथ शिंदे यांच्यापुढे हजर करा,” अशी आक्रमक मागणी केली.
शिवसेना नेत्यांनी ही अट घातल्याशिवाय कोणतीही चर्चा होणार नाही, अशी स्पष्ट भूमिका घेतल्याने अखेर राणा पाटील यांना नमते घ्यावे लागले. त्यांनी मूळ भाजपचे पण शिवसेनेच्या तिकिटावर निवडून आलेले बनसोडे आणि शिंदे यांना उपमुख्यमंत्री एकनाथ शिंदे यांच्यापुढे हजर केले. यावेळी पालकमंत्री प्रताप सरनाईक आणि संपर्कप्रमुख राजन साळवी उपस्थित होते.
‘पेड’ कार्यकर्त्यांच्या वावड्या आणि पोलखोल
वस्तुस्थिती अशी असताना, राणा पाटील यांचे ‘भाडोत्री’ आणि पेड कार्यकर्ते मल्लू नेरुळकर यांच्या सांगण्यावरून सोशल मीडियावर एक वेगळाच ‘फेक नॅरेटिव्ह’ चालवण्याचा प्रयत्न झाला. भेटीचे फोटो व्हायरल करून, “तानाजी सावंत यांना वगळून भाजप शिवसेनेच्या ७ सदस्यांना (रवी गायकवाड, ज्ञानराज चौगुले समर्थक) सोबत घेऊन सत्ता स्थापन करणार,” अशा खोट्या वावड्या उठवल्या गेल्या.
“येड्यागत कारभार…” : अविनाश खोपे-पाटलांचा प्रहार
या खोट्या बातम्यांवर अविनाश खोपे-पाटील यांनी फेसबुक पोस्टद्वारे थेट संताप व्यक्त केला:
“येड्यागत कारभार, किती ! चुकीच्या बातम्या पेरणार ? हसू येत राव !! तुमच्या याच धोरणाने धाराशिव जिल्हा हा देशाच्या आकांक्षित जिल्ह्याच्या यादीत आणि विकासापासून वंचित ठेवण्याचे काम तुम्ही केले, हे धाराशिव जिल्ह्यातील जनतेच्या चांगलच लक्षात आलंय !!!”
राजन साळवींचा ‘मास्टरस्ट्रोक’; फोटोतून राणा पाटलांना केले ‘कट’
खोट्या बातम्यांचा हा फुगा शिवसेना संपर्कप्रमुख राजन साळवी यांनी एकाच पोस्टमध्ये फोडून टाकला. त्यांनी भेटीचा फोटो शेअर करताना आमदार राणा पाटील यांना चक्क ‘कट’ (क्रॉप) करून टाकले आणि अत्यंत सूचक कॅप्शन दिले:
“शिवसेना अभेद्य 🚩
शिवसेना मुख्यनेते, राज्याचे उपमुख्यमंत्री सन्मा. श्री. एकनाथ शिंदे साहेब यांची नवनिर्वाचित शिवसेना जि. प. सदस्य श्री. सुनील बनसोडे व सौ. पूजा शिंदे तसेच अपक्ष सदस्य श्री. धनंजय सावंत यांनी भेट घेऊन आशीर्वाद घेतले. त्यावेळी धाराशिवचे पालकमंत्री सन्मा. श्री. प्रताप सरनाईक साहेब व उपनेते, माजी आमदार ज्ञानराज चौगुले साहेब उपस्थित होते.”
राजन साळवींच्या या अधिकृत पोस्टमुळे मल्लू नेरुळकर आणि त्यांच्या कंपूने उठवलेल्या वावड्यांची पूर्णपणे पोलखोल झाली असून, शिवसेना एकसंध असल्याचा आणि तानाजी सावंत यांना डावलले नसल्याचा स्पष्ट संदेश यातून देण्यात आला आहे.
