तामलवाडीत हादरवणारी घटना: अनैतिक संबंधांच्या संशयातून सख्या चुलत्याकडूनच १३ महिन्यांच्या पुतणीची निर्घृण हत्या

तामलवाडी: भावाच्या पत्नीच्या चारित्र्यावर आणि पर्यायाने मुलीच्या पितृत्वावर संशय घेत एका नराधम चुलत्यानेच आपल्या १३ महिन्यांच्या निष्पाप पुतणीचे अपहरण करून तिची अत्यंत क्रूरपणे हत्या केल्याची धक्कादायक घटना गवळेवाडी (तामलवाडी पोलीस ठाणे हद्द) येथे उघडकीस आली आहे. आरोपीने चिमुकलीचा गळा दाबून खून केला व त्यानंतर मृतदेहाचे तुकडे करून ते जमिनीत पुरून टाकले. तामलवाडी पोलिसांनी तपासाची चक्रे वेगाने फिरवत या गुन्ह्याची उकल अवघ्या २४ तासांत केली असून, आरोपीला अटक केली आहे.

नेमकी घटना काय?

पोलिसांनी दिलेल्या माहितीनुसार, महादेव माने (रा. गवळेवाडी) यांनी २८ फेब्रुवारी २०२६ रोजी तामलवाडी पोलीस ठाण्यात आपली १३ महिन्यांची मुलगी बेपत्ता असल्याची तक्रार दिली होती. अज्ञात व्यक्तीने तिला घरातून पळवून नेल्याचे त्यांनी तक्रारीत म्हटले होते. यावरून पोलिसांनी गु.र.नं. २९/२०२६ नुसार कलम १३७(२) बी.एन.एस. अंतर्गत गुन्हा दाखल करून तपास सुरू केला.

सदर गुन्ह्याचा तपास सहायक पोलीस निरीक्षक गोकुळ ठाकूर करत असताना, गुप्त बातमीदाराकडून मिळालेल्या माहितीनुसार पोलिसांचा संशय मुलीचा सख्खा चुलता शंकरेश्वर माने याच्यावर बळावला. पोलिसांनी त्याला ताब्यात घेऊन कसून चौकशी केली असता, त्याने आपल्या गुन्ह्याची कबुली दिली.

असा केला अंगावर काटा आणणारा खून

आरोपी शंकरेश्वर याने दिलेल्या जबाबावरून अत्यंत भयानक घटनाक्रम समोर आला आहे. त्याने २७ फेब्रुवारी २०२६ रोजी पहाटे ५:०० ते ५:३० च्या सुमारास झोपेत असलेल्या पुतणीला घरातून उचलून नेले. शेतात नेऊन त्याने आधी तिचा गळा दाबला. त्यानंतर कोयत्याच्या साहाय्याने मृतदेहाचे तुकडे करून ते पोत्यात भरले आणि जवळच्याच एका चारीमध्ये पुरून टाकले. आरोपीने दिलेल्या माहितीवरून पोलिसांनी दोन पंचांसमक्ष घटनास्थळाचा पंचनामा करून मृतदेह ताब्यात घेतला असून पुढील कायदेशीर प्रक्रिया सुरू आहे.

हत्येचे धक्कादायक कारण

प्राथमिक तपासात हत्येमागील धक्कादायक कारण समोर आले आहे. आरोपीच्या भावाच्या पत्नीचे एका परपुरुषासोबत अनैतिक संबंध असल्याचा संशय आरोपीला होता. याच संशयातून, ही १३ महिन्यांची मुलगी आपल्या भावाची नसून अनौरस असल्याचा राग त्याच्या मनात खदखदत होता. याच रागाच्या भरातून त्याने हे क्रूर पाऊल उचलल्याचे तपासात निष्पन्न झाले आहे.

पोलिसांची तत्पर कामगिरी

या अत्यंत संवेदनशील गुन्ह्याचा तपास  पोलीस अधीक्षक रितू खोखर, अप्पर पोलीस अधीक्षक शफाकत आमना यांच्या मार्गदर्शनाखाली करण्यात आला. सहायक पोलीस निरीक्षक गोकुळ ठाकूर, पोलीस हवालदार जुबेर काझी, आकाश सुरनर, नितीन भोसले, पोलीस अंमलदार सूरज नरवडे, नझीर बागवान, उमेश माने, तुराब शेख आणि मनोज गोबाडे यांच्या पथकाने अत्यंत कौशल्याने तपास करत अवघ्या २४ तासांत या गुन्ह्याचा पर्दाफाश केला आहे.