चोराखळी : डोळ्यात चटणी फेकून आणि पिस्तूल-सुऱ्याचा धाक दाखवून कालिका कलाकेंद्र चालकाच्या घरात सशस्त्र दरोडा

येरमाळा : धाराशिव जिल्ह्यातील येरमाळा पोलीस ठाण्याच्या हद्दीतील चोराखळी शिवारात कालिका सांस्कृतिक कलाकेंद्र चालकाच्या घरात सशस्त्र दरोडा पडल्याची अत्यंत धक्कादायक घटना समोर आली आहे. सोमवारी (दि. २ मार्च २०२६) पहाटेच्या सुमारास दरोडेखोरांनी पिस्तूल आणि चाकूचा धाक दाखवून, तसेच फिर्यादीच्या डोळ्यात चटणी (मिरची पूड) फेकून तब्बल ९ लाख ५१ हजार रुपयांचा मुद्देमाल लुटून नेला आहे. याप्रकरणी येरमाळा पोलीस ठाण्यात ओळखीच्या एका व्यक्तीसह ७ जणांवर गंभीर स्वरूपाचा गुन्हा दाखल करण्यात आला आहे.

नेमकी घटना काय?

चोराखळी (ता. कळंब) येथे राहणाऱ्या फिर्यादी निर्मला मोहन जाधव (वय ४५) या सांस्कृतिक कलाकेंद्र चालवतात. सध्या त्या बार्शी येथील राजलक्ष्मी कलाकेंद्र चालवतात. एफआयआरमध्ये दिलेल्या माहितीनुसार, रविवारी रात्री बार्शी येथील कलाकेंद्राचे काम आटोपून निर्मला जाधव या त्यांची मैत्रीण रेखा शिंदे, शिवम ऊर्फ गब्या आणि ड्रायव्हर शशिकांत मुंडे यांच्यासोबत इनोव्हा गाडीने पहाटे ३:३० वाजता चोराखळी येथील घरी परतल्या.

ड्रायव्हर गाडीतच झोपला, तर निर्मला आणि त्यांचे इतर दोन सहकारी दुसऱ्या मजल्यावरील घरात गेले. जेवण करून ते सर्वजण गप्पा मारत बसले असताना, पहाटे ५:३० वाजेच्या सुमारास त्यांच्या घराचे दार उघडेच होते. याच संधीचा फायदा घेत अचानक तोंडाला रुमाल आणि अर्धवट कापड बांधलेले ६ अज्ञात इसम घरात घुसले.

डोक्याला पिस्तूल, गळ्याला सुरा आणि डोळ्यात चटणी

घरात घुसताच त्यापैकी दोघांनी शिवम ऊर्फ गब्या याला खाली दाबून त्याच्या गळ्याला लोखंडी सुरा (चाकू) लावला. तसेच निर्मला जाधव यांच्या डोक्याला पिस्तूल लावून, “आवाज केला तर जीवाने मारू” अशी धमकी दिली. त्यानंतर दरोडेखोरांनी निर्मला यांच्या डोळ्यात लाल चटणी (मिरची पूड) फेकली आणि अंगावरील दागिने काढून देण्यास सांगितले.

काय-काय लुटले?

दरोडेखोरांनी अत्यंत नियोजनबद्धरीत्या घरातील किमती ऐवज लुटला. यामध्ये:

• फिर्यादी निर्मला आणि त्यांच्या मैत्रिणीच्या अंगावरील १२१.६०० ग्रॅम वजनाचे सोन्याचे दागिने (ज्याची किंमत अंदाजे ६,००,००० रुपये आहे).

• सॅमसंग गॅलेक्सी झेड फोल्ड ७ (१.७५ लाख), सॅमसंग गॅलेक्सी एस २४ अल्ट्रा (१ लाख), वन प्लस नॉर्ड आणि ओप्पो कंपनीचे असे एकूण ४ महागडे मोबाईल (किंमत ३,४९,००० रुपये).

• पुरावा नष्ट करण्यासाठी घरातील सीसीटीव्ही कॅमेऱ्याचा डीव्हीआर (किंमत २,००० रुपये).

  असा एकूण ९ लाख ५१ हजार रुपयांचा मुद्देमाल दरोडेखोरांनी चोरून नेला.

ओळखीच्याच व्यक्तीचा कट?

विशेष म्हणजे, या थरार नाट्यादरम्यान फिर्यादी निर्मला जाधव यांनी मुख्य आरोपीला त्याच्या केसांवरून आणि अर्धवट दिसणाऱ्या चेहऱ्यावरून ओळखले. सचिन ऊर्फ प्रशांत बापू पवार (रा. तेरखेडा, वाशी) असे या आरोपीचे नाव आहे. तो पूर्वी निर्मला यांच्या कलाकेंद्रावर यायचा आणि त्याच्याकडे निर्मला यांचे काही पैसेही उसने होते. तसेच, महादेव घुले (रा. तेरखेडा) यानेही या गुन्ह्यात मदत केल्याचा संशय फिर्यादीत व्यक्त करण्यात आला आहे.

पोलिसांत गुन्हा दाखल

या भयंकर घटनेनंतर निर्मला जाधव यांनी तात्काळ येरमाळा पोलीस स्टेशन गाठून तक्रार दिली. त्यांच्या फिर्यादीवरून सचिन पवार, महादेव घुले आणि सोबतचे इतर ५ अज्ञात इसम (असे एकूण ७ जण) यांच्याविरुद्ध भारतीय न्याय संहिता (BNS 2023) कलम ३१०(२), ११८(१), ३३३, ३५१(२), ३५१(३) आणि शस्त्र अधिनियम (Arms Act) कलम ३, ४, २५ अन्वये गुन्हा दाखल करण्यात आला आहे. या प्रकरणाचा पुढील तपास येरमाळा पोलीस करत आहेत.