शिराढोण : ‘आम्हाला दारू पाज’ अशी मागणी करत, पैसे नसल्याचे सांगितल्याच्या रागातून एका तरुणाला बियरच्या बाटलीने आणि लाथाबुक्क्यांनी बेदम मारहाण करून गंभीर जखमी केल्याची घटना खामसवाडी (ता. कळंब) येथील एका हॉटेलमध्ये घडली. याप्रकरणी शिराढोण पोलीस ठाण्यात गुन्हा दाखल करण्यात आला आहे.
संदीप महादेव जाधव (वय ४४, रा. खामसवाडी, ता. कळंब, जि. धाराशिव) असे या मारहाणीत गंभीर जखमी झालेल्या फिर्यादीचे नाव आहे. तर बबलु उर्फ आशुतोष केशव आडसूळ (रा. देवळाली, ता. कळंब) असे गुन्हा दाखल झालेल्या मुख्य आरोपीचे नाव आहे.
पोलिसांनी दिलेल्या माहितीनुसार, रविवारी (ता. २६ एप्रिल) दुपारी १२ वाजेच्या सुमारास संदीप जाधव हे खामसवाडी येथील अंबिका हॉटेलमध्ये होते. यावेळी आरोपी बबलु आडसूळ तिथे आला. त्याने संदीप यांना ‘आम्हाला दारू पाज’ अशी मागणी केली. यावर संदीप यांनी ‘माझ्याकडे पैसे नाहीत’ असे स्पष्ट सांगितले.
दारू पाजण्यास नकार दिल्याच्या आणि पैसे नसल्याचे सांगितल्याच्या कारणावरून आरोपीला राग आला. त्याने संदीप यांना शिवीगाळ करण्यास सुरुवात केली. त्यानंतर लाथाबुक्क्यांनी मारहाण करत, तिथेच असलेल्या बियरच्या बाटलीने मारून संदीप यांना गंभीर जखमी केले. तसेच ‘तुला जिवंत सोडणार नाही’, अशी जीवे मारण्याची धमकीही दिली.
या घटनेनंतर गंभीर जखमी झालेल्या संदीप जाधव यांच्यावर रुग्णालयात उपचार सुरू आहेत. त्यांनी सोमवारी (ता. २७ एप्रिल) दिलेल्या वैद्यकीय जबाबावरून शिराढोण पोलीस ठाण्यात आरोपी बबलु उर्फ आशुतोष आडसूळ आणि त्याच्या साथीदारांविरुद्ध [भा.न्या.सं. ३(५) नुसार] भारतीय न्याय संहितेच्या (BNS) कलम ११८(१), ११८(२), ११५(२), ३५१(२), ३५२ आणि ३(५) अन्वये गुन्हा दाखल करण्यात आला आहे. या प्रकरणाचा पुढील तपास शिराढोण पोलीस करत आहेत.
