ढोकी: एसटी बसमध्ये प्रवाशाला तिकिटाचे सुट्टे पैसे देण्याच्या क्षुल्लक कारणावरुन एका वाहकाला (कंडक्टर) अश्लील शिवीगाळ करत लाथाबुक्क्यांनी बेदम मारहाण केल्याची धक्कादायक घटना समोर आली आहे. धाराशिव तालुक्यातील कसबे तडवळे येथे हा प्रकार घडला असून, भांडण सोडवण्यासाठी आलेल्या बस चालकालाही आरोपीने धक्काबुक्की केली. याप्रकरणी शासकीय कामात अडथळा निर्माण केल्याबद्दल ढोकी पोलीस ठाण्यात गुन्हा दाखल करण्यात आला आहे.
सौदागर अण्णा होगले (रा. कसबे तडवळे, ता. जि. धाराशिव) असे गुन्हा दाखल झालेल्या संशयित आरोपीचे नाव आहे. याप्रकरणी मारोती दत्ताराव सुरोशे (वय ३५, व्यवसाय- नोकरी, रा. गारगव्हाण, ता. हदगाव, जि. नांदेड) यांनी ढोकी पोलिसांत रीतसर फिर्याद दिली आहे.
सुट्ट्या पैशांवरून एसटीत राडा
पोलिसांनी दिलेल्या माहितीनुसार, फिर्यादी मारोती सुरोशे हे एसटी महामंडळात वाहक म्हणून कार्यरत आहेत. शनिवार, दि. ३० मे रोजी सायंकाळी पावणेसात वाजेच्या सुमारास बस कसबे तडवळे परिसरात आली असताना, आरोपी सौदागर होगले याच्याशी तिकिटाचे सुट्टे पैसे देण्याघेण्यावरून वाद झाला. वाद इतका टोकाला गेला की, आरोपीने चालू बसमध्येच वाहक सुरोशे यांना जाहीरपणे अश्लील शिवीगाळ करण्यास सुरुवात केली.
चालकालाही केली धक्काबुक्की
आरोपीने रागाच्या भरात सुरोशे यांना लाथाबुक्क्यांनी बेदम मारहाण करून जखमी केले आणि त्यांचे शासकीय कर्तव्य बजावण्यापासून रोखत शासकीय कामात अडथळा निर्माण केला. हा प्रकार चालू असताना बसचे चालक मारामारी सोडवण्यासाठी आणि वाहकाच्या मदतीसाठी धावून आले. मात्र, मुजोर आरोपीने चालक महोदयांनाही हुज्जत घालत अत्यंत उद्धटपणे धक्काबुक्की केली. या अचानक झालेल्या वादामुळे बसमधील प्रवाशांमध्ये काही काळ भीतीचे व तणावाचे वातावरण निर्माण झाले होते.
ढोकी पोलिसांत गुन्हा नोंद
या घटनेनंतर पीडित एसटी वाहक मारोती सुरोशे यांनी ढोकी पोलीस ठाणे गाठून सरकारी कर्मचाऱ्यावर हल्ला आणि शासकीय कामात अडथळा आणल्याप्रकरणी तक्रार दिली. त्यांनी दिलेल्या प्रथम खबरीवरून आरोपी सौदागर अण्णा होगले याच्याविरुद्ध भारतीय न्याय संहितेच्या (BNS) संबंधित कलमांखाली गुन्हा दाखल करण्यात आला आहे. ढोकी पोलीस या प्रकरणाचा पुढील तपास करत आहेत.
