उमरगा: शासनाने प्रतिबंधित केलेल्या गुटखा आणि तंबाखूजन्य पदार्थांची उघडपणे विक्री करणाऱ्यांविरोधात उमरगा पोलिसांनी धडक कारवाई केली आहे. शहरातील साठे चौक परिसरातील एका हॉटेलसमोर प्रतिबंधित गुटखा विक्रीसाठी बाळगल्याप्रकरणी पोलिसांनी एका ३७ वर्षीय व्यक्तीला रंगेहात पकडले. त्याच्याकडून नामांकित कंपनीचा पानमसाला आणि तंबाखूचा साठा जप्त करण्यात आला असून उमरगा पोलीस ठाण्यात गुन्हा दाखल केला आहे.
दिगंबर शिवाजी पानंगे (वय ३७, रा. गौतम नगर, उमरगा, ता. उमरगा, जि. धाराशिव) असे गुन्हा दाखल झालेल्या संशयित आरोपीचे नाव आहे.
तेलंग चहापाणी हॉटेलसमोर कारवाई
उमरगा पोलीस ठाण्याचे पथक रविवार, दि. ३१ मे रोजी दुपारी हद्दीत पेट्रोलिंग करत होते. यादरम्यान दुपारी साडेतीन वाजेच्या सुमारास शहरातील साठे चौकात असलेल्या ‘तेलंग चहापाणी हॉटेल’च्या समोर एक व्यक्ती प्रतिबंधित गुटख्याची विक्री करत असल्याची माहिती पोलिसांना मिळाली. त्यानुसार पथकाने तात्काळ तिथे धाड टाकली.
अन्न सुरक्षा कायद्यांतर्गत गुन्हा नोंद
पोलिसांनी संशयास्पद रितीने थांबलेल्या दिगंबर पानंगे याची झडती घेतली असता, त्याच्याकडे महाराष्ट्रात विक्रीस बंदी असलेला विमल पान मसाला आणि व्ही ०१ टोबॅको (तंबाखू) असा एकूण १,९८० रुपये किमतीचा मुद्देमाल मिळून आला. हा साठा जप्त करून पोलिसांनी आरोपीला ताब्यात घेतले.
उमरगा पोलिसांत गुन्हा दाखल
या बेकायदेशीर गुटखा विक्रीप्रकरणी आरोपी दिगंबर पानंगे याच्याविरुद्ध उमरगा पोलीस ठाण्यात भारतीय न्याय संहिता (BNS) कलम १२३, २२३, २७४, २७५ सह ‘अन्न सुरक्षा व मानके अधिनियम’ कलम ५९ अन्वये गुन्हा नोंदवण्यात आला आहे. या प्रकरणाचा पुढील तपास उमरगा पोलीस करत आहेत.
