ढोकी (धाराशिव): धाराशिव तालुक्यातील कोंड गावामध्ये एकाच कुटुंबातील दोन गटात शिवीगाळ केल्याच्या कारणावरून तुंबळ हाणामारी झाल्याची धक्कादायक घटना समोर आली आहे. गुरुवारी संध्याकाळी घडलेल्या या हिंसक घटनेत कुऱ्हाड, लोखंडी गज, धारदार वस्तू आणि दगडांचा सर्रास वापर करण्यात आला. या प्राणघातक हल्ल्यात महिलांसह दोन्ही बाजूचे अनेक जण गंभीर जखमी झाले आहेत. याप्रकरणी ढोकी पोलीस ठाण्यात दोन्ही गटांनी एकमेकांविरुद्ध दिलेल्या तक्रारीवरून (क्रॉस एफआयआर) एकूण १४ जणांवर दंगलीसह गंभीर कलमांखाली गुन्हे दाखल केले आहेत.
पहिला गट: “आम्हाला सुना शिवीगाळ का केली?” यावरून मारहाण
ढोकी पोलिसांनी दिलेल्या माहितीनुसार, पहिल्या घटनेत सुनंदा उत्रेश्वर जमादार (वय ३०, रा. कोंड) यांनी फिर्याद दिली आहे. गुरुवार, दि. ४ जून रोजी संध्याकाळी ७ वाजेच्या सुमारास “तुम्ही आमच्या सुनांना शिवीगाळ का केली?” या कारणावरून दुसऱ्या गटाने गैरकायद्याची मंडळी जमवून सुनंदा यांच्या घराजवळ येऊन वाद घातला.
या वादाचे रूपांतर हाणामारीत झाले. आरोपींनी सुनंदा यांना अश्लील शिवीगाळ करत लाथाबुक्क्यांनी आणि थेट दगडाने मारहाण करून जखमी केले. यावेळी सुनंदा यांचे पती उत्रेश्वर आणि सासू रुक्मिणी हे दोघे भांडण सोडवण्यासाठी मध्यस्थी करायला आले असता, आरोपींनी त्यांनाही बेदम मारहाण केली आणि “तुम्हाला जिवंत सोडणार नाही,” अशी जीवे मारण्याची धमकी दिली.
-
गुन्हा दाखल झालेले आरोपी: कौशल्या जमादार, अश्विनी जमादार, आशा जमादार, आकाश जमादार, विकास जमादार, नवनाथ जमादार, गणेश जमादार आणि श्रेयश जमादार (सर्व रा. कोंड, ता. जि. धाराशिव).
-
पोलीस कारवाई: सुनंदा जमादार यांच्या फिर्यादीवरून ढोकी पोलिसांनी वरील ८ आरोपींवर भारतीय न्याय संहिता (BNS) कलम ११८(१), १८९(२), १९०, १९१(२), १९१(३), ३५२ आणि ३५१(२) अन्वये गुन्हा नोंदवला आहे.
दुसरा गट: कुऱ्हाड आणि लोखंडी गजाने प्रतिहल्ला
या मारहाणीला प्रत्युत्तर म्हणून दुसऱ्या गटाकडून आकाश नवनाथ जमादार (वय ३४, रा. कोंड) यांनी प्रतिफिर्याद दिली आहे. त्यांच्या तक्रारीनुसार, “तू माझ्या भावजईला शिवीगाळ का केलीस?” अशी विचारणा करत पहिल्या गटाने हातात जीवघेणी शस्त्रे घेऊन आकाश यांच्यावर हल्ला चढवला.
आरोपींनी बेकायदेशीर जमाव जमवून आकाश यांना लाथाबुक्क्यांनी, कुऱ्हाडीने, लोखंडी गजाने आणि धारदार वस्तूने वार करून रक्ताळले. हा जीवघेणा हल्ला सुरू असताना आकाश यांचे नातेवाईक विकास जमादार, नवनाथ जमादार आणि अश्विनी जमादार हे भांडण सोडवण्यासाठी धावले असता, आरोपींनी त्यांनाही लोखंडी गजाने व शस्त्रांनी मारहाण करून गंभीर जखमी केले आणि परिसरात जीवे मारण्याची धमकी देत दहशत माजवली.
-
गुन्हा दाखल झालेले आरोपी: उत्रेश्वर जमादार, विठ्ठल जमादार, विजय जमादार, विशाल जमादार, विमल जमादार आणि सुनंदा जमादार (सर्व रा. कोंड, ता. जि. धाराशिव).
-
पोलीस कारवाई: आकाश जमादार यांच्या फिर्यादीवरून ढोकी पोलिसांनी वरील ६ आरोपींविरुद्ध BNS कलम ११८(१), १८९(२), १९१(२), १९१(३), ३५२ आणि ३५१(२)(३) अन्वये गुन्हा दाखल केला आहे.
कोंड गावात तणाव; पोलिसांचा बंदोबस्त
एकाच कुटुंबातील दोन गटात कुऱ्हाड आणि लोखंडी गजांसारख्या घातक शस्त्रांनी झालेल्या या रक्तरंजित संघर्षामुळे कोंड गावात खळबळ उडाली असून काही काळ तणावाचे वातावरण निर्माण झाले होते. घटनेची माहिती मिळताच ढोकी पोलिसांनी गावात धाव घेऊन परिस्थिती नियंत्रणात आणली. दोन्ही बाजूचे जखमी व्यक्ती रुग्णालयात उपचार घेत असून, ढोकी पोलीस या दोन्ही परस्परविरोधी गुन्ह्यांचा पुढील सखोल तपास करत आहेत.
