धाराशिव: माननीय न्यायालयाच्या आदेशाची उघडपणे पायमल्ली करत एका ६७ वर्षीय ज्येष्ठ नागरिकाच्या घराचे हातोड्याने कुलूप तोडून, जबरदस्तीने घरात घुसून अतिक्रमण केल्याचा धक्कादायक प्रकार धाराशिव शहरात समोर आला आहे. एवढेच नव्हे तर वृद्ध दाम्पत्याला शिवीगाळ करत जीवे मारण्याची धमकी देऊन घराचा ताबा घेणाऱ्या दोन कुटुंबांतील सदस्यांसह त्यांच्या साथीदारांवर आनंदनगर पोलीस ठाण्यात गुन्हा दाखल करण्यात आला आहे.
हातोड्याने कुलूप तोडून घरात ‘दबंगगिरी’
पोलिसांकडून मिळालेल्या माहितीनुसार, अशोक दत्तोबा माळी (वय ६७ वर्षे, रा. २५/१ देवी मंदिरासमोर, उंबरे कोटा, धाराशिव) यांचे उंबरे कोटा भागात हक्काचे आणि कायदेशीर कब्जेवहीवाटीचे घर आहे. या घराबाबत माननीय न्यायालयाचे आदेश माळी यांच्या बाजूने असतानाही, आरोपींनी कायद्याला जुमानले नाही.
शुक्रवारी (१९ जून २०२६) सकाळी ११:१५ ते दुपारी १२:३० वाजण्याच्या सुमारास आरोपींनी बेकायदेशीर टोळी जमवून माळी यांच्या घरासमोर ठिय्या मांडला. त्यानंतर त्यांनी हातोड्याने घराचे कुलूप तोडले आणि घरात जबरदस्तीने प्रवेश केला.
वृद्ध दाम्पत्याला जीवे मारण्याची धमकी
या गुंडगिरीला जेव्हा अशोक माळी आणि त्यांच्या पत्नीने विरोध केला, तेव्हा आरोपींनी वृद्ध दाम्पत्याला अत्यंत गलिच्छ भाषेत शिवीगाळ केली. “तुम्हाला जीवे ठार मारू,” अशी धमकी देत त्यांनी माळी दाम्पत्याला घरातून हाकलून लावले आणि घराचा जबरीने ताबा मिळवून त्यावर अतिक्रमण केले.
आनंदनगर पोलिसात गुन्हा दाखल
या अन्यायाविरुद्ध पीडित वृद्ध अशोक माळी यांनी २० जून २०२६ रोजी आनंदनगर पोलीस ठाण्यात रीतसर फिर्याद दिली. त्यांच्या प्रथम खबरीवरून पोलिसांनी खालील आरोपींविरुद्ध गुन्हा दाखल केला आहे:
-
आरोपींची नावे:
१) ज्योती दीपक सुर्यवंशी
२) दीपक मारुती सुर्यवंशी (दोघे रा. बोंबले हनुमान चौक, धाराशिव)
३) ज्योती संतोष घोरपडे
४) संतोष शिवाजी घोरपडे
५) संतोष घोरपडेची आई (तिघे रा. धारासूर मर्दिनी देवी मंदिर जवळ, धाराशिव) आणि इतर साथीदार.
-
दाखल कलमे: पोलिसांनी आरोपींविरुद्ध भारतीय न्याय संहिता (BNS) कलम १८९, १९०, १९१(२), ३५२, ३५१(२), २२३ आणि ३३३ अन्वये गुन्हा नोंदवला आहे. न्यायालयाच्या आदेशाचे उल्लंघन करून वृद्ध नागरिकाचे घर बळकावणाऱ्या या आरोपींचा आनंदनगर पोलीस शोध घेत आहेत.
