‘धूम’ स्टाईल चोरीचा पर्दाफाश! महामार्गावर धावत्या टेम्पोवर चढून ‘व्हिस्की’चे बॉक्स लांबवणारा स्थानिक गुन्हे शाखेच्या जाळ्यात; १.२३ लाखांचा माल जप्त

धाराशिव/येरमाळा: सोलापूर-धुळे राष्ट्रीय महामार्गावर धावत्या वाहनावर चढून, ताडपत्री फाडून चोरी करणाऱ्या एका अट्टल चोराला धाराशिव स्थानिक गुन्हे शाखेच्या (LCB) पथकाने शिताफीने अटक केली आहे. आरोपीकडून १ लाख २३ हजार ३९२ रुपये किमतीच्या विदेशी दारूचे (व्हिस्की) ९ बॉक्स जप्त करण्यात आले आहेत. या कारवाईमुळे महामार्गावर धावत्या गाड्या लुटणाऱ्या टोळीचा माग काढण्यात पोलिसांना मोठे यश आले आहे.

धावत्या आयशर टेम्पोवर टाकला होता दरोडा

२१ जून २०२६ रोजी येरमाळा पोलीस ठाण्याच्या हद्दीतून सोलापूर-धुळे महामार्गावरून एक आयशर टेम्पो जात असताना चोरट्यांनी ‘धूम’ चित्रपटाच्या स्टाईलने चालत्या गाडीवर चढून, गाडीची ताडपत्री फाडली होती आणि आतील मौल्यवान साहित्य चोरून नेले होते. या धाडसी चोरीप्रकरणी येरमाळा पोलीस ठाण्यात गुन्हा नोंदणी क्रमांक २४७/२६, भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला होता. हा गुन्हा गंभीर व संवेदनशील असल्याने पोलीस अधीक्षक रितू खोखर यांनी स्थानिक गुन्हे शाखेला तपासाचे थेट आदेश दिले होते.

लक्ष्मी पारधी पेढीवरून आरोपी जेरबंद

स्थानिक गुन्हे शाखेचे पोलीस निरीक्षक विनोद इज्जपवार यांच्या मार्गदर्शनाखाली सपोनि कासार व त्यांच्या पथकाने तात्काळ तपासचक्र फिरवले. २२ जून २०२६ रोजी पथकाला गोपनीय बातमीदाराकडून पक्की माहिती मिळाली की, या चोरीतील एक संशयित तेरखेडा परिसरात आहे. त्यानुसार पोलिसांनी सापळा रचून संतोष राजेंद्र शिंदे (वय २२ वर्षे, रा. लक्ष्मी पारधी पेढी, तेरखेडा, ता. वाशी) याला शिताफीने ताब्यात घेतले.

चोरीची दिली कबुली; ‘व्हिस्की’चे ९ बॉक्स जप्त

पोलिसांनी खाकी इंगा दाखवताच आरोपी संतोष शिंदे याने आपल्या अन्य साथीदारांच्या मदतीने महामार्गावरील आयशर टेम्पोतून चोरी केल्याची कबुली दिली. पोलिसांनी त्याच्याकडून चोरीला गेलेला ‘ओकस्मिथ व्हिस्की’चा (Oaksmith Whisky) एकूण १,२३,३९२ रुपये किमतीचा ९ बॉक्स साठा पंचांसमक्ष जप्त केला. अटक करण्यात आलेल्या आरोपीला मुद्देमालासह पुढील कारवाईसाठी येरमाळा पोलिसांच्या स्वाधीन करण्यात आले असून, त्याचे इतर साथीदार कोण होते, याचा तपास आता सुरू आहे.

या पथकाने बजावली कामगिरी

सदरची धडाकेबाज कामगिरी पोलीस अधीक्षक श्रीमती रितू खोखर व अपर पोलीस अधीक्षक  सचिन पांडकर यांच्या मार्गदर्शनाखाली स्थानिक गुन्हे शाखेचे पोनि विनोद इज्जपवार, सपोनि सुदर्शन कासार, सपोनि अमोल मोरे, पोलीस अंमलदार शौकत पठाण, प्रकाश औताडे, जावेद काझी, प्रदीप वाघमारे, फरहान पठाण, महिला पोलीस अंमलदार शोभा बांगर, चालक पोलीस अंमलदार रत्नदीप डोंगरे, नागनाथ गुरव आणि रोहित दंडनाईक यांच्या पथकाने केली आहे.