आंबी: “तू मला खूप आवडतेस, मला तुझ्याशीच लग्न करायचे आहे, जर नकार दिला तर मी माझ्या जीवाचे बरे-वाईट करून घेईन,” अशी भावनिक गळ घालत आणि धमकी देत एका १७ वर्षीय अल्पवयीन मुलीवर दीड वर्षांहून अधिक काळ लैंगिक अत्याचार केल्याची धक्कादायक घटना परंडा तालुक्यातील आंबी पोलीस ठाण्याच्या हद्दीत उघडकीस आली आहे. नराधम तरुणाने पीडितेचे फोटो आणि व्हिडिओ (छायाचित्रीकरण) सोशल मीडियावर व्हायरल करण्याची धमकीही दिली होती. याप्रकरणी आंबी पोलिसांत ‘पोक्सो’ अंतर्गत गुन्हा दाखल करण्यात आला आहे.
‘ब्लॅकमेलिंग’ करून दीड वर्ष अत्याचार
पोलिसांकडून मिळालेल्या प्राथमिक माहितीनुसार, पीडित मुलगी ही १७ वर्षे ८ महिने वयाची असून ती आंबी पोलीस ठाण्याच्या हद्दीतील एका गावात राहते. गावातीलच एका तरुणाने १९ नोव्हेंबर २०२४ रोजी सायंकाळी ५:०० वाजण्याच्या सुमारास पीडितेशी संपर्क साधला. “तू मला आवडतेस, मला तुझ्याशी लग्न करायचे आहे,” असे म्हणत त्याने पीडितेवर दबाव टाकण्यास सुरुवात केली.
पीडितेने नकार दिला असता, आरोपीने “मी माझ्या जीवाचे काहीतरी बरे-वाईट करून घेईन आणि त्याला तूच जबाबदार असशील,” अशी आत्महत्येची धमकी देऊन तिला मानसिक दडपणाखाली आणले. या भीतीचा गैरफायदा घेऊन आरोपीने १९ नोव्हेंबर २०२४ ते १३ जून २०२६ दरम्यान तिच्यावर वारंवार बळजबरीने लैंगिक अत्याचार केला. यादरम्यान आरोपीने काही छायाचित्रे (फोटो) काढून, “हा प्रकार कोणाला सांगितल्यास किंवा विरोध केल्यास हे फोटो व्हायरल करीन,” अशी धमकी देऊन तिला सातत्याने ब्लॅकमेल केले.
आंबी पोलिसांत ‘पोक्सो’ सह गंभीर गुन्हे दाखल
या सततच्या त्रासाला आणि धमक्यांना कंटाळून अखेर पीडित मुलीने २४ जून २०२६ रोजी आंबी पोलीस ठाण्यात धाव घेऊन रीतसर फिर्याद नोंदवली. पीडितेच्या प्रथम खबरीवरून पोलिसांनी नराधम आरोपी तरुणाविरुद्ध भारतीय न्याय संहिता (BNS) कलम १३७ (अपहरण किंवा डांबून ठेवणे), ६३ (बलात्कार), ३५१(२) (जीवे मारण्याची किंवा नुकसानीची धमकी), ३(५) (समान उद्देश) सह बालकांचे लैंगिक अत्याचारापासून संरक्षण अधिनियम २०१२ (पोक्सो – POCSO) चे कलम ४ आणि ६ अन्वये गंभीर गुन्हा दाखल केला आहे.
(कायद्यानुसार आणि पीडितेच्या सुरक्षेच्या दृष्टीने तिचे नाव व गाव गोपनीय ठेवण्यात आले आहे).
