वाशी: वाशी शहरातील सर्वे नंबर २३ मधील जमिनीच्या खरेदी-विक्री व्यवहारात एक धक्कादायक फसवणुकीचा प्रकार समोर आला आहे. खरेदीदारासोबत अधिकृतपणे ‘इसार पावती’ (ॲडव्हान्स पेमेंट) करून व्यवहार निश्चित केलेला असताना, जमीन मालकाने खरेदीदाराला अंधारात ठेवून ती जमीन तिसऱ्यालाच परस्पर विकून टाकली. याप्रकरणी फसवणूक झालेल्या खरेदीदाराच्या तक्रारीवरून वाशी पोलीस ठाण्यात परंडा तालुक्यातील एका जमीन मालकाविरुद्ध गुन्हा दाखल करण्यात आला आहे.
८० आर जमिनीचा झाला होता व्यवहार
पोलिसांकडून मिळालेल्या प्राथमिक माहितीनुसार, फिर्यादी भारत तुळजीराम पवार (वय ५१ वर्षे, रा. वाशी, ता. वाशी) यांनी १७ जुलै २०२५ रोजी आरोपी शाबुद्दीन हसमोद्दीन मुजावर (रा. जवळा निजाम, ता. परंडा, जि. धाराशिव) याच्याकडून वाशी येथील सर्वे नंबर २३ मधील ०० हेक्टर ८० आर जमीन खरेदी करण्याचे ठरवले होते.
दोन्ही बाजूंनी नियम व अटी मान्य करत १७ जुलै २०२५ रोजी सकाळी ११:०० वाजण्याच्या सुमारास या जमिनीची रीतसर कायदेशीर ‘इसार पावती’ करून व्यवहार पक्का केला होता. यापोटी फिर्यादींनी आरोपीला बयाणाची रक्कमही दिली होती.
खरेदीदाराला अंधारात ठेवून परस्पर विक्री
इसार पावती झालेली असल्याने ठरलेल्या मुदतीत जमिनीची अधिकृत खरेदीखत (रजिस्ट्री) होणे अपेक्षित होते. मात्र, जमीन मालक शाबुद्दीन मुजावर याने फिर्यादी भारत पवार यांच्याशी प्रतारणा केली. त्याने १७ जुलै २०२५ ते १८ मार्च २०२६ या कालावधीत फिर्यादींना कोणतीही पुसटशी कल्पना न देता, १८ मार्च २०२६ रोजी सायंकाळी ५:०० वाजण्यापूर्वी ती ८० आर जमीन दुसऱ्याच व्यक्तीला परस्पर विकून टाकली आणि पवार यांच्याकडून घेतलेली रक्कम हडप केली.
वाशी पोलिसांत फसवणुकीचा गुन्हा दाखल
आपली आर्थिक आणि कायदेशीर फसवणूक झाल्याचे लक्षात आल्यानंतर, भारत पवार यांनी ३ जुलै २०२६ रोजी वाशी पोलीस ठाणे गाठून जमीन मालकाविरुद्ध रीतसर तक्रार दिली.
त्यांच्या प्रथम खबरीवरून वाशी पोलिसांनी आरोपी शाबुद्दीन हसमोद्दीन मुजावर याच्याविरुद्ध भारतीय न्याय संहिता (BNS) कलम ३१८(२) (फसवणूक करणे) अन्वये गुन्हा नोंदवला आहे. जमिनीच्या व्यवहारात फसवणूक करणाऱ्या अशा टोळ्या किंवा व्यक्तींपासून नागरिकांनी सावध राहावे, असे आवाहन पोलिसांनी केले असून वाशी पोलीस या प्रकरणाचा पुढील तपास करत आहेत.
