रूई (ढोकी) येथील किराणा दुकान फोडणारे तीन सराईत गुन्हेगार जेरबंद; साडेसहा लाखांचा मुद्देमाल जप्त

धाराशिव: रूई (ढोकी) येथील किराणा दुकान फोडून चोरी करणाऱ्या तीन सराईत आरोपींच्या मुसक्या आवळण्यात धाराशिवच्या स्थानिक गुन्हे शाखेला (LCB) यश आले आहे. पोलिसांनी या कारवाईत चोरीचा माल आणि गुन्ह्यात वापरलेल्या इनोव्हा कारसह एकूण ६,५९,६१५ रुपयांचा मुद्देमाल जप्त केला असून दोन गुन्हे उघडकीस आणले आहेत.

गुप्त माहिती आणि कारवाई दिनांक ०३ जुलै २०२६ रोजी स्थानिक गुन्हे शाखेचे पथक मालमत्तेविषयक गुन्हे उघडकीस आणण्यासाठी पेट्रोलिंग करत असताना त्यांना गुप्त माहिती मिळाली. कन्हेरवाडी पाटी येथील सुभाष भीमराव काळे याने आपल्या साथीदारांसह दोन-चार दिवसांपूर्वी इनोव्हा कारमधून तेलाचे डबे व इतर सामान चोरून आणले असून ते कन्हेरवाडी पाटी येथील त्याच्या राहत्या पत्र्याच्या शेडमध्ये ठेवले असल्याची माहिती पोलिसांना मिळाली. तसेच, हे आरोपी येरमाळा येथे इनोव्हा कार घेऊन गेले असल्याचे समजताच पथकाने तातडीने येरमाळा येथे जाऊन सापळा रचला.

या सापळ्यात पोलिसांनी तीन आरोपींना इनोव्हा कारसह ताब्यात घेतले. अटक करण्यात आलेल्या आरोपींची नावे खालीलप्रमाणे आहेत:

• सुभाष भिमराव काळे (वय ३४ वर्षे, रा. कन्हेरवाडी पाटी)

• अनिल रमेश शिंदे (वय २९ वर्षे, रा. मस्सा)

• अरूण बबन शिंदे (वय २८ वर्षे, रा. मोहा)

गुन्ह्याची कबुली आणि जप्त मुद्देमाल पोलिसांनी ताब्यात घेतलेल्या आरोपींकडे चोरीस गेलेल्या मुद्देमालाबाबत विचारपूस केली असता, त्यांनी सुरुवातीला उडवाउडवीची उत्तरे दिली. मात्र, पोलिसांनी त्यांना अधिक विश्वासात घेऊन कसून चौकशी केली असता त्यांनी गुन्ह्याची कबुली दिली.

आरोपींनी दिलेल्या माहितीनुसार, पोलिसांनी कन्हेरवाडी पाटी येथील पत्र्याच्या शेडमधून खालील मुद्देमाल जप्त केला:

• किर्ती गोल्ड व इतर कंपनीचे तेलाचे १३ डबे

• निळ्या व लाल रंगाच्या ०८ पिशव्या (ज्यामध्ये घडी डिटर्जंट व घडी स्मार्ट निरमा पावडर होती)

• गुन्हा करतेवेळी वापरलेली इनोव्हा कार

पोलिसांनी आरोपींच्या ताब्यातून एकूण ६,५९,६१५ रुपयांचा मुद्देमाल जप्त केला आहे.

पोलिस पथकाची कामगिरी

ही कारवाई पोलीस अधीक्षक श्रीमती. रितु खोखर आणि अपर पोलीस अधीक्षक सचिन पांडकर यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक नोद इज्जपवार, सपोनि सचिन खटके, सपोनि स्वप्नील वाळके (अं.मु.शाखा) यांच्यासह पोह/विनोद जानराव, नितीन जाधवर, अमोल निंबाळकर, बबन जाधवर, मनोज जगताप, मपोह/शोभा बांगर, चापोह/महेबुब अरब आणि रोहीत दंडनाईक यांच्या पथकाने ही यशस्वी कामगिरी पार पाडली.