धाराशिवजवळ स्थानिक गुन्हे शाखेची मोठी कारवाई! कत्तलीसाठी नेल्या जाणाऱ्या १० जनावरांची सुटका

धाराशिव: कत्तलीच्या उद्देशाने अत्यंत क्रूरपणे वाहनात डांबून जर्सी गायी आणि वासरांची अवैध वाहतूक करणाऱ्यांवर स्थानिक गुन्हे शाखेच्या (LCB) पथकाने धडक कारवाई केली आहे. आळणी चौकात सापळा रचून टेम्पो आणि पिकअप वाहनातून ८ गायी आणि २ वासरांची सुटका करण्यात आली असून, १८ लाख ५ हजार रुपयांचा मुद्देमाल जप्त करण्यात आला आहे. याप्रकरणी भूम तालुक्यातील दोन चालकांविरुद्ध धाराशिव ग्रामीण पोलीस ठाण्यात गुन्हा दाखल करण्यात आला आहे.

गुप्त बातमीदाराच्या माहितीवरून आळणी चौकात सापळा

पोलिसांकडून मिळालेल्या सविस्तर माहितीनुसार, २७ जुलै २०२६ रोजी स्थानिक गुन्हे शाखेचे पथक धाराशिव जिल्ह्यात मालमत्तेविरुद्धचे गुन्हे उघडकीस आणण्यासाठी आणि अवैध धंद्यांवर कारवाई करण्यासाठी पेट्रोलिंग करत होते. पथक आळणी चौक परिसरात आले असता, गुप्त बातमीदारामार्फत पक्की माहिती मिळाली की, अशोक लेलँड टेम्पो आणि पिकअप वाहनातून जर्सी गायी कत्तल करण्याच्या उद्देशाने येडशीकडून धाराशिवकडे घेऊन आल्या जात आहेत.

माहिती मिळताच एलसीबीच्या पथकाने दुपारी १:३० वाजण्याच्या सुमारास आळणी चौकात नाकेबंदी करून सापळा रचला. येडशीकडून येणारे अशोक लेलँड टेम्पो (क्रमांक MH-25 AJ-6586) आणि पिकअप (क्रमांक MH-25 P-4259) संशयास्पद वाटल्याने पोलिसांनी त्यांना हात दाखवून थांबवले.

जनावरांची क्रूरपणे वाहतूक; चालकांची नावे निष्पन्न

पोलिसांनी वाहनांची तपासणी केली असता, त्यामध्ये ८ जर्सी गायी आणि २ वासरे (अंदाजे किंमत ३,०५,००० रुपये) हालचाल करता येणार नाही अशा पद्धतीने दाटीवाटीने बांधून त्यांचा छळ करत वाहतूक केली जात असल्याचे निदर्शनास आले. पोलिसांनी तात्काळ सर्व जनावरांची सुटका केली.

वाहनातील चालकांची चौकशी केली असता त्यांनी आपली नावे खालीलप्रमाणे सांगितली:

१) दशरथ शंकर जगदाळे (वय ५२ वर्षे, रा. हिवरा, ता. भूम, जि. धाराशिव)

२) बालाजी भिकाजी सोनवणे (वय ३८ वर्षे, रा. भोनगिरी, ता. भूम, जि. धाराशिव).

१८ लाखांचा मुद्देमाल जप्त; धाराशिव ग्रामीण पोलिसांत गुन्हा

पोलिसांनी ३,०५,००० रुपयांची जनावरे आणि वाहतुकीसाठी वापरलेली दोन्ही वाहने असा एकूण १८,०५,००० रुपये (१८ लाख ५ हजार रुपये) किमतीचा मुद्देमाल जप्त केला आहे. आरोपी दशरथ जगदाळे व बालाजी सोनवणे यांच्याविरुद्ध धाराशिव ग्रामीण पोलीस ठाण्यात गुन्हा नोंदवण्यात आला आहे.

वरिष्ठ अधिकाऱ्यांच्या मार्गदर्शनाखाली कारवाई

सदरची उल्लेखनीय कारवाई पोलीस अधीक्षक श्रीमती रितू खोखर आणि अप्पर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस उपनिरीक्षक अश्विन जाधव, पोलीस हवालदार समाधान वाघमारे, महिला पोलीस हवालदार शोभा बांगर, पोलीस नाईक अशोक ढगारे, चालक पोलीस अंमलदार प्रकाश बोईनवाड, केदार शेरखाने तसेच पोलीस मुख्यालयातील QRT पथकाच्या अंमलदारांनी संयुक्तरीत्या यशस्वीरीत्या पार पाडली.