धाराशिव : वाशी शहरात किरकोळ कारणावरून उद्धव ठाकरे गट आणि भारतीय जनता पक्षाच्या दोन गटांत तुंबळ हाणामारी झाल्याची घटना मंगळवारी घडली. या हाणामारीत चार जण गंभीर जखमी झाले असून त्यांना पुढील उपचारासाठी धाराशिव येथील शासकीय रुग्णालयात हलविण्यात आले आहे. यातील एकाची प्रकृती अधिक गंभीर असल्याची प्राथमिक माहिती आहे.
मिळालेल्या माहितीनुसार, वाशी शहरातील हे दोन्ही गट प्रस्थापित राजकीय गट म्हणून ओळखले जातात. हाणामारीत उद्धव ठाकरे गटाचे नेते प्रशांत चेडे यांच्या मुलालाही दुखापत झाल्याची माहिती आहे.
घटनेची माहिती मिळताच वाशी पोलिसांनी तातडीने घटनास्थळी धाव घेतली. परिस्थिती नियंत्रणात आणण्यासाठी धाराशिव येथून अतिरिक्त पोलीस कुमक मागविण्यात आली आहे. सध्या घटनास्थळी मोठा पोलीस बंदोबस्त तैनात करण्यात आला असून शहरात तणावपूर्ण शांतता आहे.
हाणामारी नेमक्या कोणत्या कारणावरून झाली, याबाबत पोलिसांकडून तपास सुरू आहे. घटनेनंतर शहरातील परिस्थितीवर पोलिसांकडून बारकाईने लक्ष ठेवण्यात येत आहे.
