उमरगा – मित्राच्या भावाला धक्काबुक्की का करत आहात, असा जाब विचारल्याच्या रागातून मोमीन गल्लीतील एका टोळक्याने ३४ वर्षीय तरुणाला बेदम मारहाण केल्याची घटना उमरगा शहरातील मौलाना आझाद चौकात घडली आहे. गैरकायद्याची मंडळी जमवून काठ्या व दगडांनी हल्ला करत जखमी करणे आणि मारहाणीदरम्यान खाली पडलेला मोबाईल फोन चोरून नेल्याप्रकरणी उमरगा पोलीस ठाण्यात ६ जणांविरुद्ध गुन्हा दाखल करण्यात आला आहे.
नेमकी घटना काय?
मलंग प्लॉट (उमरगा) येथील रहिवासी फयाज दस्तगीर पठाण (वय ३४ वर्षे) हे १३ ऑक्टोबर २०२६ रोजी रात्री ९.१५ वाजेच्या सुमारास शहरातील मौलाना आझाद चौकात उपस्थित होते.
त्यावेळी तेथे संशयित आरोपी हे फयाज यांच्या मित्राच्या भावास धक्काबुक्की करत असल्याचे दिसले. फयाज यांनी पुढे जाऊन “माझ्या मित्राच्या भावास धक्काबुक्की का करत आहात?” असा जाब विचारला. याचा राग आल्याने मोमीन गल्लीतील आरोपींनी एकत्र येत गैरकायद्याची मंडळी जमवली.
आरोपींनी फयाज यांना अश्लील शिवीगाळ करत लाथाबुक्क्यांनी, काठ्यांनी आणि दगडाने जोरदार मारहाण केली. या हल्ल्यात फयाज हे गंभीर जखमी झाले. दरम्यान, झालेल्या झटापटीत फयाज यांचा मोबाईल फोन जमिनीवर खाली पडला असता, आरोपी परवेज हन्नुरे याने तो चोरून नेला.
उमरगा पोलिसांत ६ जणांवर गुन्हा नोंद
हल्ल्यानंतर जखमी फयाज पठाण यांनी १४ ऑक्टोबर २०२६ रोजी उमरगा पोलीस ठाण्यात जाऊन रीतसर फिर्याद दिली. त्यांच्या प्रथम खबरेवरून पोलिसांनी खालील आरोपींविरुद्ध गुन्हा दाखल केला आहे:
-
आरोपी :
१) जाहेद चौधरी
२) परवेज हन्नुरे
३) समीर मुल्ला
४) अमन चौधरी
५) परमेश्वर सौंदर्गे
६) सोनु कांबळे (सर्व रा. मोमीन गल्ली, उमरगा, जि. धाराशिव)
-
दाखल कलमे : भारतीय न्याय संहिता (BNS) कलम ११८(१), ११५(२), ३५२, ३०३(२) (चोरी), १८९(२), १९१(२), १९१(३) आणि १९०.
शहरातील मुख्य चौकात रात्रीच्या सुमारास घडलेल्या या हाणामारीच्या घटनेचा पुढील तपास उमरगा पोलीस करत आहेत.
