पक्या – जय श्रीराम भावड्या….
भावड्या – जय महाराष्ट्र पक्या…
पक्या – मग काय म्हणतंय आपलं धाराशिवचं इलेक्शन ?
भावड्या – लैच रंगात आलं बघ, नुसता जाळ अन धूर सुरु हाय…
पक्या – मग कोण बाजी मारणार ?
भावड्या – कोण म्हंजी ? ओमदादा फिक्स… लाव शर्यत …
पक्या – ऑ , ते कसं काय ?
भावड्या – ओमदादांनं लई जणांची काम केल्यात, कुणाचाबी फोन उचलतात, त्यामुळे लई जण खुश हायती..
पक्या – राणा दादा तर म्हणत व्हती, गेल्या पाच वर्सात त्यांनी एकबी काम केलं नाय…
भावड्या – अर्र , ते तसं म्हणणारच की … एरोधासाठी इरोध… दुसरं काय ?
पक्या – बरं ,ओमदादांनी अशी कोणती कामं केली ते तरी सांग…
भावड्या – आमच्या गावातील गंगी, तिला एसटीत बसायला जागा नव्हती, तिन सरळ ओमदादाला फोन केला , मग काय ? कंडक्टर स्वतः उभा राहिला अन गंगीला जागा दिली…
पक्या – अजून ?
भावड्या – एकाची जीप रस्त्यात बंद पडली, त्यानं फोन केला तर त्याला जॅक पाठवून दिला…
पक्या – अजून ?
भावड्या – एक मुलगी पुण्याला परीक्षेसाठी जात व्हती, वाटत एसटी बंद पडली तर तिला कारने पुण्याला पाठवलं..
पक्या – ऑ , पण आमच्या गावातील म्हाद्या तर ओमदादाच्या नावावर लईच बोंबलत व्हता…
भावड्या – का ? काय झालं असं ?
पक्या – त्याला दहा हजाराची नड व्हती… ओमराजेला फोन केला तर त्यांनी एकदा फोन उचलला अन पुन्हा उचललाच नाय…
भावड्या – आरं त्यायेळी ते दिल्लीत व्हते, अधिवेशन सुरु व्हतं ? बिझी असतील….
पक्या – फुकट व्हनारं काम असलं की ते करत्यात, पण पैसं मागितले तर पुन्हा फोनच उचलत नाहीत… असं म्हाद्या सांगत व्हता..
भावड्या – खरं , खोटं देव जाणो बाबा, पण कुणाचाही फोन उचललात एव्हडं मला माहिती हाय..
पक्या – आरं ते बार्शीचे राऊत साहेब पण फोन उचलतात की , आजचा व्हिडीओ बघितला का ?
भावड्या – ओमदादाची आता सगळेजण स्टाईल मारू लागल्यात … दुसरं काय ?
पक्या – बरं जाऊ दे.. कोण का येईना .. आपल्याला काय ?
भावड्या – आपल्याला गुत्तेदारीची कामं मिळतील की…
पक्या – आरं , आता बोलो असतो, पण जाऊ दे.. पुन्हा भेटू…
( या सदराचे लेखक आहेत, धाराशिव लाइव्हचे संपादक सुनील ढेपे )
