बेंबळी : येथील महादेव वाडीत जुन्या भांडणाच्या कारणावरून तरुणाला जातीवाचक शिवीगाळ करत मारहाण केल्याची घटना घडली आहे. या प्रकरणी बेंबळी पोलीस ठाण्यात दोन आरोपींविरुद्ध गुन्हा दाखल करण्यात आला आहे.
सागर रमेश जाधव (वय ३०) हे ३० जानेवारी २०२५ रोजी दुपारी २ वाजता महादेव वाडीतील हॉटेल समाधानमध्ये होते. विकास शिवलकर आणि संदेश शिवलकर या दोघांनी सागरला जुन्या भांडणावरून जातीवाचक शिवीगाळ केली. एवढ्यावरच न थांबता दोघांनी लाथा-बुक्यांनी आणि लोखंडी रॉडने सागरला बेदम मारहाण केली. यात तो गंभीर जखमी झाला आहे. आरोपींनी सागरला जीवे मारण्याची धमकी देखील दिली.
या घटनेनंतर सागर जाधव यांनी ४ फेब्रुवारी रोजी बेंबळी पोलीस ठाण्यात फिर्याद दाखल केली. पोलिसांनी विकास शिवलकर आणि संदेश शिवलकर यांच्याविरुद्ध भारतीय दंड संहिता कलम ११८ (१), ११५ (२), ३५१ (२) (३), ३५२, ३ (५) आणि अनुसूचित जाती जमाती अत्याचार प्रतिबंधक कायदा १९८९ चे कलम ३ (१) (आर), ३ (१) (एस) अन्वये गुन्हा दाखल केला आहे. या घटनेमुळे परिसरात तणावाचे वातावरण निर्माण झाले असून पोलीस अधिक तपास करत आहेत.
