भूम : तालुक्यातील वंजारवाडी येथे राज्य महामार्गावर बेकायदेशीरपणे रास्ता रोको आंदोलन करून वाहतुकीस अडथळा निर्माण केल्याप्रकरणी अध्यक्ष, उपाध्यक्ष यांच्यासह एकूण १९ जणांविरुद्ध भूम पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवार, दिनांक २४ जून २०२५ रोजी सकाळी ११:१० ते १२:१० च्या सुमारास भूम-पारडी राज्य महामार्गावर वंजारवाडी येथे हे आंदोलन करण्यात आले. आरोपींमध्ये अध्यक्ष प्रताप शहाजीराव पाटील, उपाध्यक्ष राजेंद्र दऱ्यापा मिसाळ, सचिव प्रभाकर बाजीराव डोंबाळे, सहसचिव भगवान भानुदास धुमाळ आणि इतर १५ जणांचा समावेश आहे. या सर्वांनी एकत्र जमून महामार्गावर सुमारे एक तास रास्ता रोको केला.
या आंदोलनादरम्यान आरोपींनी घोषणाबाजी करत रस्ता अडवून ठेवल्याने सामान्य नागरिक आणि प्रवाशांची मोठी गैरसोय झाली. भूम पोलीस ठाण्याचे प्रभारी अधिकारी यांनी भारतीय न्याय संहिता कलम १६८ अन्वये पूर्वसूचना देऊनही आंदोलकांनी त्याचे उल्लंघन केले.
याप्रकरणी पोलीस अंमलदार कर्णराज कोंडीराम राव यांनी दिलेल्या फिर्यादीवरून, भूम पोलीस ठाण्यात भारतीय न्याय संहिता कलम १८९(२), २२३, आणि १२६(२) अन्वये गुन्हा नोंदवण्यात आला आहे. पोलीस या प्रकरणाचा अधिक तपास करत आहेत.
