धाराशिव: – धाराशिव शहरात भारतीय जनता पक्षाला मोठा धक्का बसला आहे. भाजपचे ज्येष्ठ नेते पांडुरंग लाटे यांचे सुपुत्र अमित पांडुरंग लाटे यांनी रविवारी आपल्या सहकाऱ्यांसह शिवसेना (उद्धव बाळासाहेब ठाकरे) पक्षात जाहीर प्रवेश केला. ऐन निवडणुकीच्या काळात निष्ठावंत नेत्याच्या मुलानेच ‘मशाल’ हाती घेतल्याने राजकीय वर्तुळात चर्चांना उधाण आले आहे.
खासदार ओमराजे निंबाळकर, आमदार कैलास पाटील आणि माजी नगराध्यक्ष मकरंद राजेनिंबाळकर यांच्या प्रमुख उपस्थितीत हा पक्षप्रवेश सोहळा पार पडला. यावेळी अमित लाटे यांच्यासह कृष्णा जाधवर, किरण लोखंडे, राहुल शिरशीकर आणि काका कोळी यांनीही शिवसेनेत प्रवेश केला.
निष्ठेचे मोल नाही, आयारामांना संधी : अमित लाटे
पक्षप्रवेशानंतर आपल्या भावना व्यक्त करताना अमित लाटे यांनी भाजपच्या कार्यपद्धतीवर तीव्र नाराजी व्यक्त केली. ते म्हणाले, “माझ्या वडिलांनी डॉ. पद्मसिंह पाटील यांच्यापासून ते अगदी आता मल्हार पाटील यांच्यापर्यंत पक्षाचे काम निष्ठेने केले. मात्र, पक्षाकडून आमच्या निष्ठेचे कधीही मोल झाले नाही. निष्ठावंत बाजूला राहिले आणि काही दिवसांपूर्वी पक्षात आलेल्यांना तिकीट दिले जात आहे, हे अन्यायकारक आहे. पक्षातल्या जुन्या किंवा अन्य कोणालाही संधी दिली असती तर नाराजीचा प्रश्न नव्हता. मात्र, अशा निर्णयामुळे कार्यकर्त्यांमध्ये तीव्र नाराजी असून माझी भूमिका प्रातिनिधिक आहे.”
शिवसेनेचे संघटन झाले भक्कम
हिंदुहृदयसम्राट बाळासाहेब ठाकरे यांची विचारसरणी आणि पक्षप्रमुख उद्धव ठाकरे यांच्या संवेदनशील नेतृत्वावर विश्वास ठेवून तरुणांचा ओघ शिवसेनेकडे वाढत आहे. अमित लाटे आणि त्यांच्या सहकाऱ्यांच्या प्रवेशामुळे स्थानिक पातळीवर शिवसेनेचे (ठाकरे गट) संघटन अधिक भक्कम झाल्याचा विश्वास उपस्थित नेत्यांनी व्यक्त केला.
यावेळी अमित उंबरे, भारत काकडे, सात्विक दंडनाईक, विक्रम पाटील, दीपक जाधव, संजय भोरे, अभिजीत देशमुख, अजिंक्य राजेनिंबाळकर, लखन देशमुख, गणेश एडके, रोहित दंडनाईक, अक्षय मिसाळ यांच्यासह मोठ्या संख्येने शिवसैनिक व पदाधिकारी उपस्थित होते.
