धाराशिव: जिल्ह्यातील नळदुर्ग आणि उमरगा येथे गेल्या आठवड्यात झालेल्या दोन भीषण अपघातांमध्ये एकूण तीन जणांचा मृत्यू झाला असून, चौघे जण गंभीर जखमी झाले आहेत. दोन्ही अपघातांना भरधाव आणि निष्काळजीपणे चालवणारे ट्रकचालक जबाबदार असल्याचे प्रथमदर्शनी दिसून येत आहे. या घटनांमुळे रस्त्यांवरील सुरक्षेचा प्रश्न पुन्हा एकदा ऐरणीवर आला आहे.
नळदुर्गजवळ ट्रक-कारच्या धडकेत कर्नाटकातील दोन तरुणांचा मृत्यू
नळदुर्ग: राष्ट्रीय महामार्ग ६५ वर नळदुर्ग येथील साईबाबा हॉटेलजवळ ट्रक आणि कार यांच्यात झालेल्या समोरासमोर धडकेत कारमधील दोन तरुणांचा जागीच मृत्यू झाला, तर अन्य तिघे जण जखमी झाले आहेत. अपघातानंतर ट्रकचालक ट्रक घटनास्थळी सोडून पसार झाला. ही दुर्दैवी घटना गुरुवारी, ४ सप्टेंबर रोजी सकाळी ७ वाजण्याच्या सुमारास घडली.
रेवनसिध्दा राजशेखर निगुडगी (वय २४) आणि प्रितम सुशीलकुमार पांचाळ (वय २०, दोघेही रा. कलबुर्गी, कर्नाटक) अशी मृत तरुणांची नावे आहेत. फिर्यादी श्रीशैल राजशेखर निगुडगी (वय ३३) यांनी दिलेल्या माहितीनुसार, त्यांचे भाऊ रेवनसिध्दा आणि मित्र कारने (क्र. केए ४१ बी २६००) प्रवास करत होते. यावेळी समोरून भरधाव वेगात आलेल्या ट्रकने (क्र. एमएच १३ युबी ८६७६) त्यांच्या कारला जोरदार धडक दिली.
या अपघातात रेवनसिध्दा आणि प्रितम यांचा मृत्यू झाला, तर कारमधील मल्लू उर्फ मलकजप्पा कल्ला, पवन उर्फ हिराप्पा सुगुर आणि नागराज कट्टीमणी हे जखमी झाले. अपघातानंतर ट्रकचालकाने जखमींना मदत न करता किंवा पोलिसांना माहिती न देता घटनास्थळावरून पळ काढला. याप्रकरणी नळदुर्ग पोलीस ठाण्यात फरार ट्रकचालकाविरोधात गुन्हा नोंदवण्यात आला असून पोलीस त्याचा शोध घेत आहेत.
उमरग्यात ट्रकने मोटरसायकलला मागून धडकल्याने महिलेचा मृत्यू, पती गंभीर जखमी
उमरगा: तुरोरी-उमरगा रस्त्यावर भरधाव ट्रकने मोटरसायकलला पाठीमागून धडक दिल्याने झालेल्या अपघातात पत्नीचा जागीच मृत्यू झाला, तर पती गंभीर जखमी झाला आहे. ही घटना शुक्रवारी, ५ सप्टेंबर रोजी सकाळी ११:३० वाजण्याच्या सुमारास घडली.
राधिका पंडित कलमले (वय ४४, रा. उमरगा) असे मृत महिलेचे नाव असून, त्यांचे पती पंडित देवेंद्रअप्पा कलमले हे या अपघातात गंभीर जखमी झाले आहेत. पंडित कलमले यांनी दिलेल्या फिर्यादीनुसार, ते पत्नी राधिका यांच्यासोबत मोटरसायकलवरून (क्र. एमएच २५ एक्यू ८८२३) जात होते. त्यावेळी पाठीमागून वेगात आलेल्या ट्रकने (क्र. एमएच १३ सीयू ५१३४) त्यांच्या मोटरसायकलला जोरदार धडक दिली.
या अपघातात राधिका कलमले यांचा मृत्यू झाला. ट्रकचालक शहाजी इंगळे (रा. हालसी हत्तरगा, ता. निलंगा) याच्यावर निष्काळजीपणे वाहन चालवून मृत्यूस कारणीभूत ठरल्याप्रकरणी उमरगा पोलीस ठाण्यात गुन्हा दाखल करण्यात आला आहे.
