तुळजापूर : सोशल मीडियावर प्रचंड प्रसिद्धीझोतात आलेल्या येथील हॉटेल भाग्यश्रीचे मालक नागेश मडके यांच्या अपहरणाचा धक्कादायक प्रकार बुधवारी, दि. २३ रोजी सायंकाळी घडला. सेल्फी काढण्याच्या बहाण्याने गाडीत ओढून त्यांना जबर मारहाण करण्यात आली आणि वडगाव (सि.) जवळ फेकून देण्यात आले. या घटनेमुळे शहरात मोठी खळबळ उडाली आहे.
मिळालेल्या माहितीनुसार, धाराशिव रोडवरील हॉटेल भाग्यश्रीचे मालक नागेश मडके हे बुधवारी सायंकाळी सव्वासातच्या सुमारास हॉटेलसमोर उभे होते. यावेळी एका चारचाकी गाडीतून आलेल्या काही व्यक्तींनी त्यांच्यासोबत सेल्फी काढण्याची इच्छा व्यक्त केली. मडके सेल्फीसाठी जवळ जाताच, गाडीतील पाच जणांनी त्यांना जबरदस्तीने गाडीत ओढले.
आरोपींनी गाडीत मडके यांना जबर मारहाण केली आणि जीवे मारण्याचा त्यांचा डाव होता, असा आरोप नागेश मडके यांनी केला आहे. गाडी धाराशिवच्या दिशेने नेल्यानंतर, अपहरणकर्त्यांनी मडके यांना वडगाव (सि.) येथील पुलावर फेकून दिले आणि तेथून पळ काढला.
घटनेनंतर मडके यांनी त्यांच्या कुटुंबीयांशी संपर्क साधला, त्यानंतर त्यांना तातडीने जिल्हा शासकीय रुग्णालयात दाखल करण्यात आले. त्यांच्यावर सध्या उपचार सुरू असून त्यांची प्रकृती स्थिर असल्याचे सांगण्यात येत आहे. या प्रकरणी गुन्हा दाखल करण्याची प्रक्रिया सुरू असल्याची माहिती पोलिसांनी दिली आहे.
वारंवार होणारे हल्ले आणि सुरक्षेवर प्रश्नचिन्ह
हॉटेल भाग्यश्री गेल्या काही महिन्यांपासून सातत्याने चर्चेत आहे. मागील महिन्यात काही अज्ञातांनी हॉटेलवर हल्ला करून पोस्टर फाडले होते, तर गेल्या आठवड्यात हॉटेलमध्ये हाणामारीची घटनाही घडली होती. सोशल मीडियावर प्रसिद्ध झाल्यामुळे या हॉटेलमध्ये जेवणासाठी मोठी गर्दी असते. सुरक्षेसाठी बाऊन्सर तैनात केलेले असतानाही मालकाच्या अपहरणाचा प्रयत्न झाल्याने आश्चर्य व्यक्त केले जात आहे.
