धाराशिव: ग्राहकाला वस्तू परत घेण्यास नकार देऊन अनुचित व्यापार पद्धतीचा अवलंब केल्याप्रकरणी धाराशिव येथील ग्राहक तक्रार निवारण आयोगाने बार्शी येथील ‘जगदाळे मशीनरी स्टोअर्स’ला (प्रो. प्रा. जगदाळे बंधु,) नुकसान भरपाईचा दणका दिला आहे.
नेमके प्रकरण काय?
-
एका ग्राहकाने १९ फेब्रुवारी २०२५ रोजी सोलापूर जिल्ह्यातील बार्शी येथील शिवाजी आखाडा परिसरातील ‘जगदाळे मशीनरी स्टोअर्स’ (प्रो. प्रा. जगदाळे बंधु, विश्वास जगदाळे, सुहास जगदाळे) येथून १८०० रुपये किमतीचा ‘आयरन किंग कॉर्डलेस’ कंपनीचा ड्रिल किट सेट खरेदी केला होता.
-
खरेदीच्या वेळी ग्राहकाने पक्क्या बिलाची मागणी केली होती, परंतु दुकानदाराने ते दिले नाही.
-
सदरची खरेदी घाईगडबडीत झाली असल्याने, ग्राहक अर्ध्या तासाच्या आत ती वस्तू परत करण्यासाठी दुकानात गेला.
-
मात्र, विश्वास जगदाळे आणि सुहास जगदाळे यांनी ड्रिल किट परत घेण्यास नकार दिला आणि ग्राहक सेवा देण्यामध्ये कसूर केली.
ग्राहकाची धाव आणि आयोगाचा निकाल:
या प्रकारामुळे ग्राहकाने धाराशिव येथील ग्राहक तक्रार निवारण आयोगाकडे ग्राहक तक्रार क्रमांक ३८/२०२५ दाखल केली होती. या प्रकरणात तक्रारदाराच्या वतीने अॅड. मोईन बी. शेख यांनी योग्य तो पुरावा सादर करून बाजू मांडली.
हा युक्तिवाद ग्राह्य धरून आयोगाने १६ फेब्रुवारी २०२६ रोजी ग्राहकाच्या बाजूने आदेश पारित केले. आयोगाने दिलेल्या आदेशानुसार:
-
तक्रारदाराने खरेदीच्या वेळी असलेल्या मूळ पॅकिंगसह ड्रिल किट दुकानदारास (सामनेवाले) परत करावे.
-
दुकानदाराने वस्तू परत मिळताच ग्राहकाला त्याची खरेदी किंमत १८०० रुपये परत करावी.
-
तसेच, ग्राहकाला झालेल्या मनस्तापाबद्दल नुकसान भरपाईपोटी ३००० रुपये आणि तक्रार अर्जाच्या खर्चापोटी ३००० रुपये देण्याचे आदेशही आयोगाने दुकानदाराला दिले आहेत.
