धाराशिव – शहरातील साठे चौकात जुन्या भांडणाचा राग मनात धरून आठ जणांच्या टोळक्याने एका दाम्पत्याला शिवीगाळ करत काठी आणि लाकडी फळीने बेदम मारहाण केल्याची धक्कादायक घटना घडली आहे. शुक्रवारी, ६ जून रोजी सायंकाळी ही घटना घडली असून, याप्रकरणी धाराशिव शहर पोलीस ठाण्यात आठ जणांविरोधात गुन्हा दाखल करण्यात आला आहे.
याबाबत पोलिसांनी दिलेली माहिती अशी की, फिर्यादी रवी कार्या काळे (वय २९, रा. डेपो पारधी पिढी, तुळजापूर नाका) हे आपल्या पत्नीसह साठे चौकात होते. त्यावेळी त्यांच्याच परिसरात राहणाऱ्या आरोपींनी त्यांना मागील भांडणाच्या कारणावरून गाठले. आरोपींनी रवी काळे आणि त्यांच्या पत्नीला शिवीगाळ करण्यास सुरुवात केली आणि पाहता पाहता वादाचे रूपांतर मारहाणीत झाले.
आरोपींनी दाम्पत्याला लाथाबुक्यांनी, काठीने आणि फळीने मारहाण करून जखमी केले व जिवे ठार मारण्याची धमकी दिली. या हल्ल्यात रवी काळे आणि त्यांची पत्नी जखमी झाले आहेत.
रवी काळे यांनी दिलेल्या फिर्यादीवरून सचिन सुरेश पवार, महादेव दगडू पवार, बाशु झिंगु पवार, सकल्या अनिल काळे, भाऊ विजय पवार, लालू दादा काळे, नवा दादा काळे आणि बबलु संजय काळे (सर्व रा. डेपो पारधी पिढी, तुळजापूर नाका) यांच्या विरोधात भारतीय न्याय संहितेतील विविध कलमांन्वये गुन्हा नोंदवण्यात आला आहे. धाराशिव शहर पोलीस या प्रकरणाचा पुढील तपास करत आहेत.
