धाराशिव: तालुक्यातील आळणी येथे एका धक्कादायक घटनेत, पत्नीच्या अनैतिक संबंधांमुळे होणाऱ्या मानसिक त्रासाला कंटाळून पतीने आपले जीवन संपवले आहे. तानाजी नानासाहेब भराडे असे आत्महत्या केलेल्या शेतकऱ्याचे नाव आहे. आत्महत्येपूर्वी त्यांनी एक व्हिडिओ रेकॉर्ड करून सोशल मीडियावर प्रसारित केला, ज्यात त्यांनी आपल्या आत्महत्येमागील कारण स्पष्ट केले आहे.
मिळालेल्या माहितीनुसार, आळणी येथील रहिवासी असलेले तानाजी भराडे यांनी आपल्या शेतात गळफास घेऊन आत्महत्या केली. आत्महत्येपूर्वी रेकॉर्ड केलेल्या व्हिडिओमध्ये त्यांनी आपली पत्नी अनुराधा हिचे धाराशिव शहरातील दुकानदार बालाजी घाडगे यांच्यासोबत अनैतिक संबंध असल्याचा आरोप केला आहे. बालाजी घाडगे हेदेखील विवाहित असून दोघांनाही मुले आहेत.
व्हिडिओमध्ये तानाजी भराडे यांनी म्हटले आहे की, “पत्नी अनुराधा आणि तिचा प्रियकर बालाजी घाडगे हे दोघे मिळून मला मानसिक त्रास देत होते. त्यांच्या या वागणुकीमुळे मी व्यथित झालो असून, याच कारणामुळे मी आत्महत्या करत आहे.”
या घटनेनंतर तानाजी भराडे यांच्या नातेवाईकांनी तीव्र संताप व्यक्त केला आहे. त्यांनी याप्रकरणी गुन्हा नोंदवून तानाजी यांची पत्नी अनुराधा भराडे आणि तिचा प्रियकर बालाजी घाडगे यांच्यावर कठोर कारवाई करण्याची मागणी केली आहे. या घटनेमुळे परिसरात हळहळ व्यक्त केली जात असून, पोलिसांनी पुढील तपासाला सुरुवात केली आहे.
