परंडा : दारूच्या नशेत एका पित्याने आपल्याच नऊ वर्षीय पोटच्या मुलीच्या डोक्यात कुऱ्हाडीचे घाव घालून तिची निर्घृण हत्या केली. ही हृदय पिळवटून टाकणारी घटना परंडा तालुक्यातील शेळगाव येथे घडली असून, या घटनेने संपूर्ण परिसरात खळबळ उडाली आहे. गौरी ज्ञानेश्वर जाधव असे मृत मुलीचे नाव आहे. पोलिसांनी आरोपी बाप ज्ञानेश्वर जाधव याला अटक केली असून, न्यायालयाने त्याला तीन दिवसांची पोलीस कोठडी सुनावली आहे.
काय घडले नेमके?
शेळगाव येथील ज्ञानेश्वर जाधव याला दारूचे व्यसन जडले होते. त्याच्या या व्यसनामुळे त्याची मुलगी गौरी ही आपल्या आजीसोबत राहत होती. गौरी गावातीलच शाळेत इयत्ता चौथीत शिकत होती. दोन दिवसांपूर्वी तिची आजी घरी नसताना, दारूच्या नशेत असलेल्या ज्ञानेश्वरने गौरीवर कुऱ्हाडीने हल्ला केला. डोक्यात वर्मी घाव बसल्याने गौरीचा जागीच मृत्यू झाला.
हत्येमागे आजारपणाचे कारण
पोलिसांनी दिलेल्या माहितीनुसार, गौरी वारंवार आजारी पडत होती. याच कारणावरून बाप ज्ञानेश्वरने तिची हत्या केल्याचे सांगितले जात आहे. मात्र, त्याच्या दारूच्या व्यसनामुळेच हे राक्षसी कृत्य घडल्याचे स्पष्ट झाले आहे. धक्कादायक बाब म्हणजे, हत्या केल्यानंतर आरोपी ज्ञानेश्वरने पुरावे नष्ट करण्याचाही प्रयत्न केला होता. मात्र, घरी परतलेल्या आजीच्या सतर्कतेमुळे हा प्रकार उघडकीस आला.
या घटनेची माहिती मिळताच आंबी पोलिसांनी तात्काळ घटनास्थळी धाव घेऊन आरोपी बाप ज्ञानेश्वर जाधव याला अटक केली. त्याला न्यायालयात हजर केले असता, न्यायालयाने तीन दिवसांची पोलीस कोठडी सुनावली आहे. एका बापानेच आपल्या निरागस मुलीचा जीव घेतल्याने परिसरातून तीव्र संताप व्यक्त होत आहे.
