धाराशिव : महा ग्रामीण बँकेच्या धाराशिव शाखेत आर्थिक फायदा करून देण्याचे आमिष दाखवून एका व्यक्तीने फिर्यादीचा विश्वास संपादन करत तब्बल २९ लाख रुपयांची फसवणूक केल्याची घटना उघडकीस आली आहे. ही घटना २५ जानेवारी २०२५ पासून आतापर्यंतच्या कालावधीत घडली असून, याप्रकरणी आनंदनगर पोलीस ठाण्यात पुण्याच्या एका व्यक्तीविरुद्ध गुन्हा नोंदवण्यात आला आहे.
याबाबत अधिक माहिती अशी की, फिर्यादी विनोद शिवाजीराव गपाट (वय ४९ वर्षे, रा. आनंदनगर, धाराशिव) यांना आरोपी सोमनाथ कोंडे (रा. मधुसुधन पार्क, बिबेवाडी, पुणे) याने आर्थिक फायदा करून देण्याचे आमिष दाखवले. आरोपीने फिर्यादीचा विश्वास संपादन करून त्यांना पुणे-सातारा रोडवरील ‘महालक्ष्मी रिअल इस्टेट’ व ‘हॉटेल रोहित गार्डन’ येथे एकूण २९,००,००० रुपयांची गुंतवणूक करण्यास सांगितले.
फिर्यादीने आरोपीवर विश्वास ठेवून ही गुंतवणूक केली. मात्र, आरोपीने गुंतवणुकीचा कोणताही फायदा किंवा नफा फिर्यादीस परत न करता त्यांची फसवणूक केली. आपली फसवणूक झाल्याचे लक्षात आल्यानंतर विनोद गपाट यांनी १६ मे २०२५ रोजी आनंदनगर पोलीस ठाण्यात धाव घेत तक्रार दाखल केली.
फिर्यादी विनोद गपाट यांनी दिलेल्या प्रथम खबरेवरून पोलिसांनी आरोपी सोमनाथ कोंडे याच्याविरुद्ध भारतीय न्याय संहिता कलम ३१६ (२) (फसवणूक) आणि कलम ३१८ (४) (फौजदारी विश्वासघात) अन्वये गुन्हा नोंदवला आहे. पोलीस या प्रकरणाचा अधिक तपास करत आहेत.
